Qazaqstanda Armenııanyń mádenıet kúnderi ótedi

ASTANA. KAZINFORM - 15-16 qazan kúnderi Astana qalasynda Qazaqstandaǵy Armenııanyń mádenıet kúnderi ótedi. Mádenıet kúnderi aıasynda birqatar mádenı is-sharalar josparlanǵan, dep málimdedi QR Mádenıet jáne aqparat mınıstrligi.

Armıan kınosy kúnderiniń ashylýy Astana qalasyndaǵy «Kınopark 7 IMAX Kerýen» kınoteatrynda ótetin «Armıan anımatsııasynyń sıqyrly álemi» anımatsııalyq baǵdarlamasymen bastalady. Sonymen qatar qazaqstandyq kórermenderge rejısser Arman Chılıngarıannyń «Jaryq tamshylary» kórkem fılmi usynylady.

Merekelik kontsert Qalıbek Qýanyshbaev atyndaǵy Qazaq ulttyq mýzykalyq drama teatrynda ótedi. Onda Armenııanyń Memlekettik djaz orkestri óner kórsetedi.

Aıta ketsek, Armenııanyń Memlekettik djaz orkestri –1938 jyly qurylǵan KSRO-nyń alǵashqy djaz ujymdarynyń biri. Áıgili mýzykanttarymen, baı repertýarymen tanymal ujym búginde álemdegi eń úzdik orkestrlerdiń biri.

Sonymen qatar Sergeı Paradjanovtyń 100 jyldyq mereıtoıyna arnalǵan fotokórme uıymdastyrylady. Kórmede Sergeı Paradjanov mýzeıiniń muraǵatynan 45 fotosýret usynylady. Onyń 20-sy belgili kınorejısserdiń kúndelikti ómiri men shyǵarmashylyq oılaryna, al 25-i kórkem týyndylaryna arnalǵan.

16 qazanda rejısser Edgar Bagdasarıannyń «ıAsha ı Leonıd Brejnev» atty kórkem fılmi kórsetiledi.

Qazaqstandaǵy Armenııanyń mádenıet kúnderi Qalıbek Qýanyshbaev atyndaǵy Qazaq ulttyq mýzykalyq drama teatrynda ótetin Sosa Sarkısıan atyndaǵy «Amangaın» memlekettik teatrynyń «Lıý-Bef» spektaklimen qorytyndylanady.

Aıta keteıika, búgin Memleket basshysy Armenııa Premer-mınıstri Nıkol Pashınıanmen telefon arqyly sóılesti.