Qazaqstanda alımentke qatysty zań qalaı ózgerýi múmkin
ASTANA. KAZINFORM – Qazaqstanda alımentke qatysty jańa zań jobasy ázirlenedi. Bul jóninde Bala quqyqtary jónindegi ýákil Dınara Zákıeva Senatqa tıisti usynyspen júgingen.
Boryshkerdi izdestirý protsesindegi kedergiler
Ýákildiń aıtýynsha, alıment eń az degende tómengi kúnkóris deńgeıimen shamalas, ıaǵnı 43 myń teńge bolýy qajet. Sonymen qatar, sot oryndaýshylaryna boryshkerdiń bank esepshottary týraly málimetterdi suraýǵa múmkindik berýdi jáne alıment tóleýshilerdiń jumys oryndaryna jalaqy mólsherin habarlaýdy mindetteý kózdelip otyr.
«Qazirgi ýaqytta boryshkerdi izdestirý talapkerdiń, ıaǵnı alıment alýshynyń tirkelgen mekenjaıy boıynsha júrgiziledi. Bul — aqylǵa qonymsyz jáne tıimsiz, sebebi alıment alýshy basqa óńirde nemese tipti basqa elde turýy múmkin. Mysaly, boryshker Túrkistan oblysynda tursa, izdestirý Mańǵystaý oblysynda júrgiziledi, óıtkeni alıment alýshy Mańǵystaý oblysynda turady. Osylaısha, qaryz alýshylardy tabý is júzinde múmkin emes», — dedi D. Zákıeva.
Alımentti kóbeıtýmen másele sheshilmeıdi
Jýyrda senator Janna Asanova osyndaı tólemderdi esepteý tártibin qaıta qaraýdy usyndy. Depýtattyń aıtýynsha, «Neke (erli-zaıyptylyq) jáne otbasy týraly» kodekste alıment bir balaǵa ata-ana tabysynyń tórtten birin quraıtyny kórsetilgen. Alıment tóleıtin ata-ana kóbinese is júzinde eń tómengi jalaqyny 85 myń teńge etip kórsetip, kirisin tómendetip júredi. Nátıjesinde bir balaǵa alıment nebári 22 myń teńge bolady.
«Alıment taqyryby tutas qoǵamdy alańdatyp júrgen másele ekeni belgili boldy. Bala quqyǵy jónindegi ýákil Dınara Zákıeva zań jobasy jóninde Senatqa usynys engizdi. Al biz Májilis depýtattarymen birlesip, arnaıy jumys tobyn qurdyq jáne zań jobasyn ázirleýge kiristik. Qazir jan-jaqty taldaý júrgizip jatyrmyz, aldyn ala eshteńeni kesip aıta almaımyz. Óıtkeni, bar másele alıment mólsherin kóbeıtýmen sheshile salmaıdy. Munda ata-ananyń da, balanyń da, alıment alýshynyń da, berýshiniń de jaǵdaıyn ádil eskerýimiz kerek. Sondyqtan da bul — óte kúrdeli jumys», — deıdi Senat depýtaty.
11 myń áıel alıment tólep júr
Al Ádilet mınıstrligi alıment boryshy týraly resmı statıstıkany jarııa etti. Búgingi tańda respýblıka boıynsha sot oryndaýshylarynyń oryndaýynda alıment óndirip alý týraly 322 myń atqarýshylyq is bar. Ondaǵy 311 myńnan astam boryshker — er azamat bolsa, 11 myńnan astam boryshker áıel bar.
«Bıylǵy 9 aı ishinde 33 mlrd teńge somasyna 25 myń óndiris problemaly bolyp tanyldy, ıaǵnı boryshker alımentterin turaqty túrde tólemeıdi. Degenmen Ádilet mınıstrligi atqarǵan aýqymdy jumys nátıjesinde bıyl 7 mlrd teńge somasyna alıment boıynsha bereshek óndirildi. Alıment týraly óndiristerdiń 95,6%-y boıynsha óndirip alý aı saıyn jumys berýshilerdiń býhgalterlik qyzmetteri arqyly júzege asyrylady», — dep jazylǵan mınıstrlik habarlamasynda.
