Qazaqstanda alǵash ret jazanyń jańa túri BQO-da qoldanyldy

ORAL. KAZINFORM — Oral qalasynyń ákimshilik quqyq buzýshylyqtar jónindegi mamandandyrylǵan sotynda jańa jaza túrin — qoǵamdyq jumystardy qoldaný týraly Qazaqstandaǵy alǵashqy sheshim shyǵaryldy.

BQO sotynyń baspasóz qyzmetinen málim etkenindeı, 2025 jylǵy 1 qyrkúıekten bastap Qazaqstanda Ákimshilik quqyq buzýshylyq týraly kodekske ózgerister kúshine endi.

Buǵan deıin atalmysh kodekstiń 73-baby 2-bóligi tek qana balamasyz ákimshilik qamaý túrindegi jazany kózdegen edi. Al endi sońǵy ózgeristerge sáıkes, balama retinde — qoǵamdyq jumystar taǵaıyndalýy múmkin.

2025 jylǵy 4 qyrkúıekte sot azamatqa kodekstiń 73-baby 2-bóligi boıynsha 40 saǵat qoǵamdyq jumystar jazasyn taǵaıyndady.

Sot talqysynda belgili bolǵanyndaı, quqyq buzýshy mas kúıinde zaıybyna balaǵat sózder aıtyp, otbasynyń tynyshtyǵyn buzǵan. Bul jaǵdaı birneshe ret qaıtalanǵan. 

- Jazany taǵaıyndaý kezinde sot jaýaptylyqty jeńildetetin mán-jaılardy — taraptardyń tatýlasýyn, sondaı-aq quqyq buzýshy men jábirlenýshiniń qoǵamdyq jumystardy ádil jaza sharasy retinde erikti túrde qabyldaǵanyn eskerdi. Sot qaýlysy zańdy kúshine engen joq. Zańgerler bul oqıǵany tarıhı pretsedent dep atap otyr, óıtkeni endi Oraldaǵy ákimshilik ister tek qana jazalaýmen shektelmeı, tárbıelik sıpatqa da ıe bolady, - dep habarlady vedomstvodan.

Eske sala keteıik, budan buryn Oralda júrgizýshilik quqyǵynan aıyrylsa da, rýlge otyrǵan muǵalim áıelge aıyppul salynǵanyn jazǵan edik.