Qazaqstanda alǵash ret áleýmettik qyzmetkerler testileýden ótti

NUR-SULTAN. QazAqparat - Qazaqstanda halyqty áleýmettik qorǵaý júıesinde jumys isteıtin 11 myńnan astam adamdy aýqymdy testileý aıaqtaldy. Bul týraly QazAqparat Eńbek jáne áleýmettik qorǵaý mınıstrligine silteme jasap habarlaıdy.

Áleýmettik qyzmetkerler, medıtsınalyq-áleýmettik mekemeler men halyqty jumyspen qamtý ortalyqtarynyń dırektorlary, úıde áleýmettik kómek kórsetý bólimsheleriniń meńgerýshileri, áleýmettik jumys jónindegi mamandar men konsýltanttar, jumyspen qamtý ortalyqtarynyń assıstentteri men konsýltanttary bilimderi men quzyretterin baǵalaýdan ótti.

QR Eńbek jáne halyqty áleýmettik qorǵaý vıtse-mınıstri Erlan Áýkenovtiń tóraǵalyǵymen ótken jıynda Áleýmettik jumystyń basym máseleleri jónindegi vedomstvoaralyq keńestiń kezekti otyrysynda Áleýmettik jumys jónindegi ulttyq resýrstyq ortalyqtyń ókilderi áleýmettik qyzmetkerlerdi testileý qorytyndylaryn tanystyrdy.

Testileý 2020 jylǵy qarashadan bastap 2021 jylǵy naýryzǵa deıin 2 kezeńde ótti: negizgi testileý jáne ótý balyn ala almaǵandar úshin qaıta ótkizý. Atalǵan is-sharanyń maqsaty – áleýmettik qyzmetkerlerdiń bilimin baǵalaý jáne arnaýly áleýmettik qyzmetter men ataýly áleýmettik kómek kórsetý sapasyn arttyrý. Bilim men quzyrettilikti baǵalaýǵa barlyǵy 11,6 myń adam qatysty.

Testileýden ótýge 140 mınýt bólindi. Osy ýaqyt ishinde áleýmettik qyzmetkerler jalpy 13 suraqqa (saýalnamalyq derekterdi qalyptastyrý úshin), zańnamany, kásibı etıka normalaryn jáne praktıkalyq daǵdylardy bilýge arnalǵan 65 suraqqa jaýap berýge, sondaı-aq jeke erekshelikterin, kommýnıkatıvtik quzyrettilikterin, emotsııalyq ıntellekt deńgeıin jáne emotsııalyq kúızelisti anyqtaýǵa baǵyttalǵan psıhologııalyq test tapsyrýǵa tıis boldy.

«Áleýmettik qyzmetkerlerdiń 91% - y ótý balyn jınady. Mundaı testileý el aýqymynda alǵash ret ótkizilip otyrǵandyqtan, Eńbek jáne halyqty áleýmettik qorǵaý mınıstrligi ótý balyn jınaı almaǵan tulǵalarǵa canktsııalar qoldanbaǵan, olar úshin oqytý semınarlary men qaıta testileý uıymdastyryldy», – dep atap ótti Erlan Áýkenov.

Іs-sharany uıymdastyrýshylardyń aıtýynsha, áleýmettik qyzmetkerlerdiń bilimin tekserýden basqa, testileý olar týraly málimetter bazasyn qurýǵa, osy sanattyń mártebesin arttyrý jáne áleýmettik qyzmet kórsetý júıesin jetildirý boıynsha usynystar jınaýǵa múmkindik berdi.