Qazaqstanda Airbus-tyń ortalyǵy ashylady
ASTANA. KAZINFORM — Premer-mınıstrdiń birinshi orynbasary Roman Sklıar Úkimet úıindegi baspasóz máslıhatynda Qazaqstanda Airbus-tyń ortalyǵy ashylatynyn málim etti.
— Jýyqta siz Airbus kompanııasynyń ókilderimen kezdesip, Qazaqstanda áskerı jáne memlekettik ushaqtardy jóndeıtin ortalyq ashý kerektigin aıttyńyz. Bizde ushaq jóndeıtin óz kásipornymyz bar. Biraq «Qazaqstan avıatsııa ındýstrııasy» kompanııasynyń moınyna qazir mıllıardtaǵan qaryz ilingen. 9 mlrd teńgeden astam bıýdjet aqshasyn jumsap qurylǵan zaýyttan 65 ınjener shyǵyp ketken. Qazir tipti salyǵyn tóleı almaı otyr. Sonda osy problemadan Airbus-tyń ókildigin ashý arqyly qutylmaqshysyzdar ma, álde Airbus qaryzǵa batqan «Qazaqstan avıatsııa ındýstrııasy» kompanııasyna ınvetsor bolyp kele me? — dep surady jýrnalıst.
Birinshi vıtse-premer Qazaqstan Airbus ónimderin kóp satyp alatynyn aıtyp ótti.
— Shynymen de Airbus kompanııasynyń ókilderimen kezdestim. Ókinishke qaraı, qazir memlekettiń úlesi bar «Qazaqstan avıatsııa ındýstrııasy» kompanııasynyń qarjylyq jaǵdaıy qıyn. Kompanııa basshylyǵynyń áreketteri osyndaı jaǵdaıǵa ákeldi. Qylmystyq is te qozǵalǵan. Quqyq qorǵaý organdary sheshim shyǵarady. Bul mámleniń máni mynada. Biz Airbus-tyń ónimin, ushaqtary men tikushaqtaryn satyp alyp otyr ekenbiz, olarǵa qyzmet kórsetetin oryndy dál Qazaqstannyń ózinde uıymdastyrýymyz kerek. Shetelden satyp alǵan áýe kemelerin shetelde jóndetý tájirıbesi durys emes, — dedi ol.
Roman Sklıardyń aıtýynsha, Qazaqstanda Airbus sııaqty alpaýyt kompanııalardyń ókildigin ashýdyń jaǵymdy tájirıbesi bar.
— Almaty oblysynda tikushaq jóndeıtin zaýyt tabysty jumys istep tur. Ónerkásip jáne qurylys mınıstrligi osy máselemen aınalysyp jatyr. Qorǵanys mınıstrligi de bul strategııany qoldap otyr. Áýe tehnıkasy ózimizde jóndelip, ózimizde jumys oryndary ashylý kerek. Tıisti quzyretter de ózimizde qalyptasýy kerek. Sheteldik servıs kompanııalary tapqan tabys ta ózimizde qalý kerek. Bul — bizdiń ustanym. «Qazaqstan avıatsııa ındýstrııasy» kompanııasy ózi bólek jumys isteıdi. Onyń syrtynda Airbus-tyń ortalyǵy bólek ashylady, — dedi Premer-mınıstrdiń orynbasary.
Aıta keteıik, keshe Roman Sklıar Airbus-tyń Eýropa boıynsha prezıdenti Joan Pelısemen avıatsııa salasyndaǵy yntymaqtastyqty damytý jaıyn talqylap, Qazaqstan aýmaǵynda azamattyq jáne memlekettik avıatsııa ushaqtaryn jóndeý men qyzmet kórsetý ortalyǵyn ashý qajettigin málimdegen bolatyn.