Qazaqstanda 4 sheteldik loýkosterdiń áýe baǵyttary ashylady

ASTANA. KAZINFORM — QR Kólik vıtse-mınıstri Talǵat Lastaev elimizdiń áýe naryǵyna qandaı jańa sheteldik loýkosterler keletinin aıtyp berdi.

Vıtse-mınıstrdiń aıtýynsha, Qazaqstanda jyl saıyn halyqaralyq áýe reısteriniń sany artyp keledi. Qazir 31 eldiń 58 qalasyna 119 baǵyt boıynsha reıster oryndalady.

— Byltyr 22 halyqaralyq baǵyt boıynsha 6 jańa qalaǵa 12 reıs ashyldy. Olardyń qatarynda Mýmbaı (Úndistan), Djıdda (Saýd Arabııasy), Praga (Chehııa) sııaqty iri qalalar bar. Sonymen qatar, 10 baǵyttaǵy reıster qaıta jandandy, — dedi T. Lastaev Úkimettiń búgingi otyrysynda.

Al bıyl 16 jańa baǵyt ashý josparlanýda. Olardyń qatarynda Rım, Mıýnhen, Býdapesht, Shanhaı, Gýanchjoý, Pýsan (Ońtústik Koreıa) jáne basqa qalalar bar.

— Qazaqstannyń halyqaralyq áýe naryǵyna 4 jańa sheteldik loýkosterdiń kelýimen jolaýshylarǵa bıýdjettik áýe baǵyttaryn usyný múmkindigi artady. Olar: SpiceJet (Úndistan), Eastar Jet jáne T’way Air (Ońtústik Koreıa), ThayAirAsia (Taıland), — dep túsindirdi spıker.

Sondaı-aq, ótken jyly «ashyq aspan» rejımi Qyzylorda, Qostanaı jáne Atyraý áýejaılarynda engizildi jáne barlyq halyqaralyq áýejaılarda jumys istep tur.

Aıta keteıik, ótken jyly qazaqstandyq áýe kompanııalar 15 mln-ǵa jýyq jolaýshy tasymaldaǵan.

Al áýe reısteriniń keshigýin azaıtý úshin jańa ushaqtar satyp alý josparlanýda.