Qazaqstanda 32 myńǵa jýyq sheteldik stýdent oqıdy
ASTANA. KAZINFORM – Bıyl elimizdiń joǵary oqý oryndarynda 31,5 myń sheteldik stýdent bilim alyp jatyr. Bul týraly Kazinform agenttiginiń resmı saýalyna Ǵylym jáne joǵary bilim mınıstrliginiń resmı jaýabynda jazylǵan.
Qazaqstan sońǵy jyldary halyqaralyq bilim berý arenasynda óz pozıtsııasyn nyǵaıtyp kele jatyr. 2022–2023 jyldary COVID-19 pandemııasy áserinen sheteldik stýdentter sany ýaqytsha azaıǵanymen, jalpy kórsetkishte ósim bar.
— 2020 jyly kúndizgi bólimde — 28,1 myń, 2021 jyly — 28,7 myń, 2022 jyly — 26 myń, 2023 jyly — 26,8 myń sheteldik stýdent bilim aldy. Al 2024 jyly bul kórsetkish kúrt ósip, 31,5 myńǵa jetti. Bul — sońǵy bes jyldaǵy eń joǵary kórsetkish, - delingen jaýapta.
Mınıstrliktiń habarlaýynsha, 2025 jylǵy málimetterdi esepteý áli tolyq aıaqtalmaǵan, sonyń ózinde kórsetkishte ósim baryn aıtýǵa bolady.
Bir qyzyǵy, sońǵy 4 jylda Úndistannan keletin stýdentter sany 3 ese artqan.
— Sheteldik stýdentter arasynda eń kóbi — Úndistannan kelgender: 2024 jyly olardyń sany 12 020-ǵa jetken. Salystyra ketsek, 2020 jyly bul kórsetkish 4 340 bolǵan. Olar kóbine medıtsına, aqparattyq tehnologııalar jáne ınjenerııa baǵyttaryn tańdaıdy, - delingen habarlamada.
Ekinshi orynda Túrikmenstan tur. Bul elden 2020 jyly — 2 989, al 2024 jyly 3 962 stýdent kelgen.
Qazaqstanǵa oqýǵa keletin reseılik stýdentter sany da artqany baıqalady: 2020 jyly — 1 176 bolsa, 2024 jyly — 3 005. Reseı azamattary úshin Qazaqstannyń joǵary oqý oryndary qoljetimdiligimen, oqý baǵdarlamalarynyń uqsastyǵymen jáne dıplomdardyń ózara moıyndalýymen tartymdy.
Sondaı-aq qytaılyq stýdentter sany da eki esege artqan: 2020 jyly — 977 bolsa, 2024 jyly — 2 089. Olar negizinen tehnıkalyq jáne ınjenerlik mamandyqtarǵa qyzyǵýshylyq tanytady.
Odan bólek, Pákistannan keletin stýdentter sany da aıtarlyqtaı ósken: 2020 jyly — 107 bolsa, 2024 jyly — 1 192. Bul 11 eseden astam ósim. Bundaı Qazaqstannyń joǵary oqý oryndary Ońtústik Azııa elderinde bilim berý baǵdarlamalaryn belsendi nasıhattaý jáne halyqaralyq kórmelerge qatysý arqyly qol jetkizdi.
Osylaısha, Qazaqstan tek TMD elderinen ǵana emes, búkil Azııa memleketterinen stýdentterdi tartatyn ortalyqqa aınalyp keledi. Bul — elimizdiń halyqaralyq bilim berý naryǵynda óz úlesin jyl sanap arttyryp kele jatqanynyń aıqyn kórinisi.
Sheteldik stýdentter ne sebepti bizdiń eldi tańdaıdy? Kazinform tilshisiniń saýalyna oraı, Ǵylym jáne joǵary bilim mınıstrligi sheteldik stýdentterdi elimizge tartyp turatyn birneshe negizgi faktordy atap kórsetti.