Qazaqstanda 24 monopolıst tarıfti tómendetti

ASTANA. QazAqparat - QR Ulttyq ekonomıka mınıstri Tımýr Súleımenov Memleket basshysynyń 7 qarashada Qaýipsizdik keńesinde bergen tapsyrmalaryn oryndaý barysyn baıandady, dep habarlaıdy QazAqparat.

«QR Bas Prokýratýrasynyń usynymyn oryndaý aıasynda monopolısterdiń elektr energııasyn berý jáne jabdyqtaý salasyndaǵy qyzmetterge arnalǵan tarıfterdi tómendetý baǵytynda jumys júrgizildi. Búgingi kúni  10 monopolıst boıynsha jylýmen jabdyqtaý qyzmetterine 4,4 mlrd teńge somaǵa (Astana jáne Almaty qalalary, Aqmola, Aqtóbe, Almaty, Batys Qazaqstan, Jambyl, Qaraǵandy, Shyǵys Qazaqstan oblystary) tarıfter tómendetildi.

Sonymen qatar, 14 monopolıst boıynsha elektr energııasyn taratý jáne jabdyqtaý qyzmetterine 12,1 mlrd teńge somaǵa (Astana, Almaty jáne Shymkent qalalary, Pavlodar, Qaraǵandy, Atyraý, Aqtóbe, Aqmola, Shyǵys Qazaqstan, Almaty, Qyzylorda jáne Batys Qazaqstan oblystary) tarıfter deńgeıi túsirildi», - dedi T. Súleımenov.

Atap aıtqanda, halyqpen keri baılanysty uıymdastyrý úshin barlyq oblys ortalyqtarynda, Astana, Almaty jáne Shymkent qalalarynda, 12 qarashada turǵyn úı-kommýnaldyq sharýashylyq salasyndaǵy problemalyq máseleler boıynsha halyqty qoǵamdyq qabyldaýlar ashyldy. Tek qana bir kúnde qatysýshylar sany 617 adamdy qurady.

Osyndaı qoǵamdyq qabyldaýlar apta saıynǵy negizde ótkiziletin bolady.

«Ótkizilgen qoǵamdyq qabyldaýlar qorytyndylary boıynsha 2018 jylǵy 16 qarashaǵa deıin kelip túsken shaǵymdardyń negizinde sýmen jabdyqtaý, sý burý, jylýmen jabdyqtaý jáne elektr energııasy men gaz berý, jabdyqtaý qyzmetterin kórsetetin bazalyq monopolıster qyzmetine jospardan tys tekserister júrgizý uıymdastyrylatyn bolady», - dedi mınıstr.

Budan buryn habarlanǵandaı, jaqynda Aqordada Qaýipsizdik keńesiniń otyrysynda Memleket basshysy Nursultan Nazarbaev  kommýnaldyq qyzmetterge tarıfterdi zańsyz ósirgen tabıǵı monopolııalar sýbektilerin jazalaýdy talap etti.

Sonymen qatar Prezıdent Qazaqstanda elektr energııasy qunyn tómendetýdi tapsyrdy.