Qazaqstan jeti aıda 48,9 mlrd dollardyń ónimin eksporttady

NUR-SULTAN. QazAqparat – 2022 jyldyń jeti aıynda Qazaqstannyń syrtqy taýar aınalymy 74,3 mlrd dollarǵa jetti. Bul týraly QR Ulttyq ekonomıka mınıstri Álibek Qýantyrov Úkimet otyrysynda jálim etti, dep habarlaıdy QazAqparat tilshisi.

«Bıylǵy qańtar-shildede syrtqy saýda taýar aınalymy 36,9% ósip, 74,3 mlrd dollardy qurady. Onyń ishinde eksport boıynsha kórsetkish 52,9% artyp, 48,9 mlrd dollarǵa deıin jetti. Bul rette óńdelgen taýarlar eksporty 35,7% ulǵaıyp, 14,3 mlrd dollardy qurady. Taýarlar ımporty 25,3 mlrd dollardy qurady. Jalpy, oń saýda balansy 23,6 mlrd dollarǵa teń», - dedi Álibek Qýantyrov,

Aıtýynsha, óńdeý ónerkásibinde oń ósý qarqyny saqtalyp otyr. Qańtar-tamyz aralyǵynda óndiris kólemi 4,8% ósken.

«Sonyń ishinde 16 óńir boıynsha oń ósý kórsetkishi tirkeldi. Eń joǵarǵy ósý Shyǵys Qazaqstan, Jambyl jáne Qostanaı oblystarynda, sondaı-aq Almaty qalasynda baıqalyp otyr.

Óńdeý ónerkásibi salalary boıynsha mashına jasaý óndirisiniń 7,9%, onyń ishinde avtomobıl jasaýdyń – 18,2%, elektr jabdyqtaryn jasaýdyń – 8,3%, azyq-túlik taýarlary – 3,5%, sýsyndar – 7,5%, plastmassa buıymdary – 5,1%, daıyn metall buıymdary – 2,4%, hımııa ónerkásibi taýarlarynyń – 11,8%, kıim óndirisiniń – 7,1% ósýi qamtamasyz etildi», - dedi mınıstr.