Qazaqstan Túrkııaǵa ne eksporttaıdy
«Túrkııaǵa metall eksporttap jatyrmyz. Bul Túrkııaǵa eksporttalatyn negizgi taýar túrleri. Al ol elden toqyma zattaryn, mashınalardy, jabdyqtardy jáne basqa da halyq tutynatyn taýarlardy alamyz», - dedi Erjan Birjanov Senatta tilshiler suraǵyna jaýap bere otyryp.
Sonymen qatar mınıstrlik ókili Túrkııamen aradaǵy keden derekteri boıynsha aıyrmashylyqtar jaıynda aıtty.
«Qazir Túrkııamen derekter boıynsha aıyrmashylyqqa toqtalsaq, taýar aınalymynda 0,8 paıyzdy qurady. Aqshalaı eseptegende, jylyna 12 mıllıon dollarǵa jetedi», - dedi vıtse-mınıstr.
Túrkııa Qazaqstannyń negizgi saýda-ekonomıkalyq seriktesiniń biri sanalady. Qazaqstan Respýblıkasymen saýdada Túrkııa 3-orynda (EAEO-ǵa múshe memleketterdi qospaǵanda) tur.
«2020 jyly eki eldiń arasyndaǵy saýda aınalymy 3,1 mlrd AQSh dollaryn qurady. Al 2022 jyldyń qorytyndysy boıynsha taýar aınalymynyń kólemi 6,3 mlrd dollarǵa jetti. 2023 jyldyń birinshi jartyjyldyǵynda bul kórsetkish 3,2 mlrd dollar boldy. Ekinshi jartyjyldyqta taýar aınalymy aıtarlyqtaı ósýi múmkin», - dedi Erjan Birjanov.
Budan buryn habarlanǵandaı, búgin Senattyń jalpy otyrysynda «Qazaqstan Úkimeti men Túrkııa Úkimeti arasyndaǵy aqparat almasýdy uıymdastyrý jáne kedendik baqylaý rásimderin ońaılatý týraly kelisimdi ratıfıkatsııalaý týraly» Zańy maquldandy.
Qujat aıasynda Qazaqstan men Túrkııa arasynda kedendik baqylaý rásimderi jeńildeıdi.
