Qazaqstan tarıhynyń kóptomdyǵy qashan baspaǵa daıyn bolady
ASTANA. KAZINFORM — Qazaqstan tarıhynyń kóptomdyǵyn baspaǵa daıyndaý jumystary qarqyndy júrip jatyr. Qazir akademııalyq eńbektiń termınologııasyn birizdendirý, tarıhı materıaldar men ıllıýstratsııalardy júıeleý, mátinderdi redaktsııalaý jáne betteý jumystary júrgizilip jatyr. Bul týraly Vıtse-Prezıdent Erlan Qarın málimdedi.
— Qazaqstan tarıhynyń kóptomdyǵyn baspaǵa daıyndaý jumystary qyzý júrip jatyr. Qazir akademııalyq eńbektegi termınologııany birizdendirý, tarıhı materıaldar men ıllıýstratsııalardy júıeleý, mátinderdi redaktsııalaý, betteý jáne basqa da baspa aldyndaǵy jumystar atqarylyp jatyr, — dedi Vıtse-Prezıdent.
Erlan Tynymbaıuly osy iske jaýapty redaktorlar ujymymen birge kún tártibindegi máselelerdi talqylaǵanyn aıtty.
— Akademııalyq basylymnyń baspaǵa sapaly ári talapqa saı daıyndalýyna qatysty atqarylyp jatqan sharýalardyń barysyn saraladyq. Bul baǵyttaǵy jumys júıeli túrde jalǵasady, — dedi ol.
Erlan Qarın buǵan deıin Qazaqstandaǵy eskertkishterdiń mazmundyq jáne maǵynalyq sapasyn arttyrý boıynsha júıeli jumys bastalatynyn málimdedi. Onyń aıtýynsha, eskertkishter ulttyq biregeılik pen ortaq qundylyqtardy dáripteýi kerek.
