Qazaqstan shyn máninde beıbit el - sheteldik baıqaýshy

ASTANA. QazAqparat - Búgin QR Ortalyq saılaý komıssııasynyń múshesi Marat Sársembaev Ulybrıtanııa men Soltústik Irlandııa Birikken Koroldiginen kelgen halyqaralyq baıqaýshylarmen kezdesti.

«Bul saılaýǵa shaqyrtý alýym - men úshin zor mártebe. Aldaǵy demalys kúnderi qazaqstandyq demokratııany kórgimiz keledi. Biz saılaýǵa qatysatyn jáne óz kandıdattaryn usynǵan Qazaqstandaǵy barlyq saıası partııalardy zerdelep shyqtyq. Menińshe, ol úshin mańyzdy sát daýys berý ýaqytynda týyndaıtyn bolady. Bizdiń negizgi maqsatymyz - Qazaqstandaǵy demokratııanyń qanshalyqty shynaıy ekendigin tekserý», - dedi kezdesýden keıin BAQ ókilderine suhbat bergen «Integrative Media LLP» kompanııasynyń bas atqarýshy dırektory Alan Djon Spens.
Onyń paıymynsha, bul saılaý Qazaqstandaǵy demokratııany odan ary nyǵaıtýdaǵy mańyzdy máseleniń birine aınalady.
«Biz Qazaqstanda oryn alyp jatqan ózgeristerge qoldaý bildiremiz. Ulybrıtanııa men Qazaqstan arasyndaǵy qarym-qatynas jyldan jylǵa nyǵaıyp keledi. Osy rette Qazaqstan úshin mańyzdy jetistikterdiń biri - onyń BUU Qaýipsizdik keńesiniń turaqty emes múshesi bolýǵa umytylysy. Qazaqstan shyn máninde beıbit el», - dedi Alan Djon Spens.