«Qazaqstan» shıpajaıy memleketke qaıtaryldy
ASTANA. KAZINFORM - Almaty qalasynyń prokýrorlary «Qazaqstan» shıpajaıyn memleketke qaıtardy.
Almaty qalalyq prokýratýrasy baspasóz qyzmetiniń habarlaýynsha, 2013 jyly shıpajaı dırektory «Qazaqstan» shıpajaıynyń barlyq múlkin kepilge qoıyp, kiristi jasandy túrde arttyryp, ǵımarattardy jóndeýge 2,6 mıllıard teńge nesıe alǵan.
2021 jyly 700 mıllıon teńgeden astam qarjyny jymqyrǵany úshin dırektor men shıpajaıdyń ózge de qyzmetkerleri bas bostandyǵynan aıyryldy.
Nesıe berý kezinde bank shıpajaıdyń tólem qabiletine taldaý júrgizbegeni anyqtaldy. Osyǵan qaramastan 2022 jyly sot jalpy 3 mlrd teńge qaryzdy óndirdi.
Almaty qalasy prokýratýrasynyń apellıatsııalyq shaǵymy boıynsha birinshi satydaǵy sottyń sheshimi ózgertilip, bul soma 1,8 mlrd teńgege deıin qysqartyldy.
Óz kezeginde Medeý aýdanynyń prokýratýrasy kepil shartynyń zańsyzdyǵy men jaramsyzdyǵyna baılanysty ony jaramsyz dep taný týraly sotqa júgindi.
2023 jyldyń 12-shi jeltoqsanynda prokýrordyń talap aryzyn Almaty qalasy AMES qanaǵattandyrdy.
«Osylaısha, prokýratýra qoldanǵan sharalardyń arqasynda quny 7 mıllıard teńgeden asatyn memlekettik sanatorıı zańsyz kepilden alynyp, onyń qaryzy 1,2 mıllıard teńgege qysqardy», - delingen Almaty qalasy prokýratýrasynyń taratqan baspasóz-baıanynda.
