Qazaqstan sanktsııaǵa túsken «Lýkoıldyń» eldegi úlesin satyp ala ma

ASTANA. KAZINFORM – Energetıka mınıstriniń orynbasary Sanjar Járkeshov Úkimet otyrysynan keıin ótip jatqan baspasóz máslıhatynda sanktsııaǵa túsken «Lýkoıldyń»  Qazaqstandaǵy jobalary týraly pikir bildirdi.

- «Lýkoıl» kompanııasy Qazaqstandaǵy qaı kompanııalarda úlesin ustap otyr? Jalpy ol úlesterdi ózimizge satyp alý josparda bar ma, - dep surady jýrnalıst.

Sanjar Járkeshov ázirge ondaı másele talqylanyp jatpaǵanyn aıtty.

- Mundaı suraq qoıýǵa áli erte dep esepteımin. Shyn máninde «Lýkoıl» - «QazMunaıGazdyń» seriktesi. Olardyń «Qalam-Hazar» jobasy sııaqty óz mindetteri bar. Biraq úlesti satyp alý nemese aktsıonerler quramyn qaıta retteý máselesimen Energetıka mınıstrligi aınalyspaıdy. Óıtkeni «QazMunaıGaz» ulttyq kompanııasynyń sharýashylyq máselesi bolyp esepteledi. Suraǵyńyzdy solarǵa baǵyttaı alasyz, - dedi vıtse-mınıstr.

Aıta ketý kerek, 22 qazanda AQSh sanktsııasyna túsken «Lýkoıl» kompanııasy ózge elderdegi úlesin jappaı satatyny habarlandy.

Osyǵan deıin «Lýkoıl» Rýmynııa men Moldovadaǵy janarmaı quıý beketterin «QazMunaıGaz»-ǵa satýy múmkin ekeni týraly jazdyq.