Qazaqstan óz jasandy ıntellektisin jasap shyǵarady
ASTANA. KAZINFORM – Qazaqstan Chat GPT sekildi óz jasandy ıntellektin jasap shyǵarmaq. Aqyldy júıe KazLLM dep atalady. Atalǵan JI modeli sýperkompıýterlik ınfraqurylym tolyq iske qosylǵannan keıin jumysyn bastaıdy. Bul týraly Tsıfrlyq damý, ınnovatsııalar jáne aeroǵarysh ónerkásibi mınıstrligi málimdedi.
– 2024 jylǵy 12 aqpanda Qazaqstan Respýblıkasy men Birikken Arab Ámirlikteri Presight AI Ltd. kompanııasy arasynda sýperkompıýter qurý jáne tıisti derekterdi óńdeý ortalyǵyn salý jobasy boıynsha kelisimge qol qoıyldy. Atalǵan joba eki kezeńde júzege asyrylady. Birinshi kezeńde esepteý qýattaryn AO «Ulttyq aqparattyq tehnologııalar» DÓO-da ornalastyrý josparlanǵan, ekinshi kezeńde jańa DÓO qurylysyn salý jáne esepteý qýattaryn ornalastyrý kózdelip otyr. Osylaısha, Mınıstrlik G42 kompanııasymen birlesip, Nvidia esepteý qýattaryn eksporttaýǵa lıtsenzııa alý jumystaryn júrgizýde, - deıdi mınıstrlik mamandary agenttik tilshisiniń saýalyna oraı.
Atalǵan lıtsenzııany alý úshin elimizdegi derekterdi óńdeý ortalyǵy joǵary deńgeıdegi qaýipsizdik standarttaryna saı kelýi kerek. Bul óz kezeginde ortalyqtaǵy derekterdiń qatań saqtalýyn jáne syrtqa shyqpaýyn qamtamasyz etedi.
– DÓO-yn joǵary deńgeıdegi qaýipsizdik standarttaryna sáıkestendirý jumystary júrgizilýde. Qalyptasyp kele jatqan sýperkompıýterlik ınfraqurylym jasandy ıntellekttiń ulttyq platformasymen ıntegratsııalanatyn bolady jáne memlekettik tsıfrlyq ónimderdi ázirleý men engizý úshin negizgi elementke aınalady. KazLLM úlken tildik modelin qoldaýǵa jáne onyń negizinde II-agentterdi qurýǵa erekshe kóńil bólinedi. Sondaı-aq, Mınıstrlik bıznes pen ǵylymı qoǵamdastyq úshin esepteý qýattaryn usyný múmkindigin qarastyrýda. Sýperkompıýterlik jáne gıpermasshtabty derekterdi óńdeý ortalyqtary bultty tehnologııalardy, jasandy ıntellektini jáne joǵary ónimdi esepteýlerdi (HPC) damytýǵa berik ınfraqurylymdyq negiz qalyptastyrady. Bul ortalyqtar zamanaýı tsıfrlyq sheshimderdi engizýge, ǵylymı zertteýler júrgizýge jáne memlekettik qyzmetterdi tıimdi tsıfrlandyrýǵa múmkindik beredi, - deıdi olar.
Aıta keteıik, atqarylyp jatqan jumystar nátıjeli bolsa, qazaq tilinde eshqandaı qatesiz, erkin sóılep, jaqsy jumys isteı alatyn jasandy ıntellekt paıda bolady.
Esterińizde bolsa, buǵan deıin sýperkompıýterdi qurý úshin qajetti jabdyqtardy AQSh-tan jetkizý protsesi qalaı júrip jatqanyn jazǵan edik.
Al birneshe kún buryn Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev bul qurylǵylardyń bıyl elimizge jetkiziletinin habarlady.