Qazaqstan Otan qorǵaýshylar kúnin toılaýda
Sherýdiń saltanatty ashylýy saǵat 10.00-ge josparlanǵan. Merekelik is-sharaǵa sherý toby, áskerı tehnıka, qorǵanys, ishki ister, tótenshe jaǵdaılar mınıstrlikteriniń avıatsııasy, sondaı-aq QR UQK Shekara qyzmeti, QR Respýblıkalyq gvardııasy qatysady.
Bıylǵy áskerı sherýdiń basty ereksheligi onda otandyq áskerı-óndiristik zaýyttarda qurastyrylyp, jańǵyrtylǵan tehnıkalar kórsetiledi. Bul týraly Qazaqstan Respýblıkasy Qarýly Kúshteri Qurlyq áskerleriniń bas qolbasshysy general-leıtenant Murat Máıkeev 4 mamyr kúni OKQ ótken brıfıngte osylaı málim etti .
«Bul buǵan deıin bolmaǵan. 2011 jyly biz elimizge, qoǵamǵa shet elderden, atap aıtqanda Reseı men Túrkııadan, Izraılden alynǵan áskerı júıelerdi pash etken bolatynbyz. Al bıyl da bundaı júıeler bolady, degenmen basty erekshelik otandyq óndiriste. Qazaqstannyń zamanaýı qorǵanys ónerkásibi 350-den astam tank, 40-tan astam BMP, 110-nan astam BTR-dy bizge usynyp otyr. Olardyń qurastyrylymy tolyqtaı qazaqstandyq zaýytta júzege asty», - dedi Murat Máıkeev.
Onyń aıtýynsha, qazaqstandyq áskerı tehnıkanyń sapasy shetelden satyp alynatyn tehnıkanyń ozyq úlgilerinen esh kem túspeıdi. Budan bólek, áskerı sherý barysynda batystyq standarttar boıynsha jaraqtalǵan arnaıy operatsııa kúshteri de áskerı saltanatty sappen júrip ótetin bolady.
Áskerı sherýge 2,5 myńnan astam adam, 250 tehnıka men 75 áýe tehnıkasy qatysady.
Aıta keteıik, 1992 jylǵy mamyrdyń 7-inde Memlekettik qorǵanys komıteti Qazaqstan Respýblıkasynyń Qorǵanys mınıstrligi bolyp qaıta quryldy. Dál osy kúni QR Prezıdenti N.Á.Nazarbaevtyń Jarlyǵymen Qazaqstan Respýblıkasynyń Qarýly Kúshteri quryldy. 7-shi mamyr - Otan qorǵaýshylar kúni Bas qolbasshy - Elbasy kezekti áskerı shender berý týraly Jarlyqqa qol qoıyp, erekshe kózge túsken áskerı qyzmetkerlerdi marapattaıdy.
2012 jylǵy 4 qazanda Qazaqstan Respýblıkasynyń Parlamenti "Qazaqstan Respýblıkasyndaǵy merekeler týraly" Qazaqstan Respýblıkasynyń zańyna ózgerister engizý týraly" erejeni qarap, qabyldaǵan bolatyn. Zańǵa sáıkes 7 mamyr memlekettik mereke bolyp jarııalandy jáne demalys kúni sanalady.