Qazaqstan oqýshylary PISA testin tapsyrýdy bastady

Osy jylǵy 6 qarashadan 15 jeltoqsanǵa deıingi aralyqta elimizdegi 1000 mektebinde «PISA-based Test for Schools (Mektepterge arnalǵan PISA)» halyqaralyq zertteýi ótedi, dep habarlaıdy Kazinform.

Mektepterge arnalǵan PISA-ǵa elimizdiń barlyq aımaǵynan 54 myńnan astam 15 jasar oqýshy qatysady.

Zertteý PISA dástúrli zertteýdiń ádisnamasyna negizdelgen jáne mekteptiń bilim jetistikteriniń jan-jaqty kórinisin qalyptastyra otyryp, oqý, matematıka men jaratylystaný ǵylymdary syndy fýnktsıonaldy saýattylyqtyń negizgi daǵdylaryn baǵalaıdy.

«3 jyldyq tsıkldy quraıtyn negizgi PISA-dan mektepterge arnalǵan PISA-nyń aıyrmashylyǵy — ol jyl saıyn ótkiziledi jáne árbir jekelegen mektep deńgeıinde nátıjelerdi taldaýǵa, jaqsartýǵa bolatyn naqty baǵyttardy anyqtaıtyn jeke esep alýǵa múmkindik beredi. Jan-jaqty tolyqtyrylǵan esepti mektep ákimshiligi bilim sapasyn arttyrý strategııasy men baǵdarlamalaryn ázirleýge paıdalana alady», — deıdi Oqý-aǵartý mınıstrligi bilim salasynda sapany qamtamasyz etý saıasaty basqarmasynyń basshysy Dınara Abylkanova.

Eske salaıyq, mektepterge arnalǵan PISA-ny Ekonomıkalyq yntymaqtastyq jáne damý uıymy (Organization for Economic Cooperation and Development) ótkizip jatyr.

2022 jylǵy mektepterge arnalǵan PISA qorytyndysy boıynsha 1000 bilim berý uıymy 428 jeke jáne 172 toptyq esep aldy.

Atap óteıik, búginde zertteý álemniń 14 elinde júrgiziledi.

Onyń ishinde Avstralııa, Ulybrıtanııa, AQSh, Reseı, Ispanııa, Qytaı elderi bar.

Zertteý tek bilim men daǵdylardy ǵana baǵalaýǵa emes, sonymen qatar eldegi jáne álemdegi basqa qatysýshy mekteptermen salystyrǵanda oqýshylardyń oqý úlgerimine áser etetin faktorlardy anyqtaýǵa baǵyttalǵan.