Qazaqstan men Túrkııa arasyndaǵy saýda kólemi artpaq
Aıta keteıik, Almatyda Islam elderiniń standarttary men metrologııasy ınstıtýty (SMIIC) metrologııalyq keńesiniń 11-shi otyrysy ótip jatyr. Otyrysta 35 elden kelgen delegattar metrologııa, tehnıkalyq retteý jáne halal ındýstrııasy máselelerin talqylady.
«Osy maqsatta biz búgin QazStandartpen ýaǵdalastyqtardy iske asyrý jónindegi is-sharalar josparyna qol qoıdyq. Onda negizgi mindet jalpy ólsheý etalondaryn belgileý jáne standartty úlgilerdiń neǵurlym talap etiletin túrleriniń birlesken óndirisin qurý bolyp tabylady. Bul eki eldiń óndirýshilerine óz ónimderin eksporttaýǵa kómektesedi. Osynyń nátıjesinde Qazaqstan men Túrkııa arasyndaǵy saýda kólemin 5-ten 10 mlrd dollarǵa deıin jetkizý josparlanyp otyr», - dep málim etti «Tubitak Ume» Túrkııa metrologııa ınstıtýtynyń bas dırektory Mýstafa Chetıntash.
Qazaqstan standarttaý jáne metrologııa ınstıtýtynyń bas dırektory Ǵabıt Muhambetovtyń aıtýynsha, bıyl Islam yntymaqtastyq uıymyna múshe elderdiń ózara josparly taýar aınalym kólemi 14 mlrd dollardan asady.
«Qazaqstannyń SMIIC-ke qatysýy jáne osy kezdesýge tóraǵalyq etýi Azııa men Eýropany biriktiretin, álemdik arenada ózara tıimdi yntymaqtastyq algorıtmderin quratyn eýrazııalyq habqa aınalyp kele jatqanyn aıǵaqtaıdy. Halal ındýstrııasy álemdik ekonomıkadaǵy qarqyndy damyp kele jatqan trendterdiń biri. Islam yntymaqtastyq uıymyna múshe elderiniń 2022 jylǵa arnalǵan taýar aınalymynyń kólemi 14 mlrd dollardan asady. Halal ónimderiniń áleýeti azyq-túlik salasynan basqa aýyl sharýashylyǵy, farmatsevtıka, kosmetıka, toqyma jáne aıaq kıim ónerkásibin de qamtıdy», - dedi Ǵabıt Muhambetov.
