Qazaqstan men Ózbekstan prezıdentteri «Medeý» sport keshenine bardy
ALMATY. KAZINFORM — Qasym-Jomart Toqaev pen Shavkat Mırzıeev «Medeý» muz aıdynyn aralap kórip, taý shatqalynda ornalasqan biregeı nysannyń tarıhynan syr shertetin fotokórmemen tanysty. Bul týraly Aqorda málim etti.
Qasym-Jomart Toqaev pen Shavkat Mırzıeev «Medeý» muz aıdynyn aralap kórip, taý shatqalynda ornalasqan biregeı nysannyń tarıhynan syr shertetin fotokórmemen tanysty.
— Muz aıdynynyń álemdik sport tarıhyndaǵy orny erekshe. Prezıdentterge 1972-1991 jyldary munda áıelder men erler arasynda ótken jarystarda barlyq qashyqtyq boıynsha 247 ret rekord ornatylǵany jóninde aıtyldy. «Medeý» áli kúnge Qazaqstannyń eń tanymal týrıstik nysandarynyń sanatyna kiredi, — delingen habarlamada.
2024-2025 jylǵy maýsymda muz aıdynyna 460 myń adam kelgen. Memleketter basshylaryna «Medeýdi» ornyqty týrızm modeli bar álemdik deńgeıdegi ortalyqqa aınaldyrýdy kózdeıtin jańa damý jobasy tanystyryldy. Qasym-Jomart Toqaev pen Shavkat Mırzıeev almatylyq sportshy Evgenıı Koshkınmen áńgimelesti.
Ol bıyl Álem kýboginiń sońǵy eki kezeńinde jeńimpaz atanyp, Álem chempıonaty men Azııa oıyndarynda júldeli orynnan kóringen bolatyn. Jýyrda ótken Qazaqstan spartakıadasynda sportshy aıqyn jeńiske jetip, 100 metr qashyqtyqta beıresmı álem rekordyn jańartty (9,31 sekýnd). Budan keıin memleketter basshylary mánerlep syrǵanaý sheberleriniń ónerin tamashalady.
Buǵan deıin habarlanǵandaı, Ózbekstan Prezıdenti Shavkat Mırzıeev Qazaqstanǵa jumys saparymen keldi.
Sapar barysynda Prezıdent pen Shavkat Mırzıeev Almaty taý shańǵysy klasterimen tanysty.