Qazaqstan men Ózbekstan arasyndaǵy taýar aınalymy $3,8 mlrd asty

TAShKENT. KAZINFORM – Bıylǵy 11 aıdyń qorytyndysy boıynsha Qazaqstan Ózbekstannyń negizgi saýda seriktesteriniń úshtiginde qaldy, dep habarlaıdy Kazinform agenttiginiń menshikti tilshisi.

Qańtar-qarasha aralyǵynda eldiń syrtqy saýda aınalymy 59,4 mlrd dollarǵa jetip, byltyrǵy kezeńmen salystyrǵanda 3,6%-ǵa ósti.

Ózbekstan Statıstıka agenttiginiń aqparatyna saı, búgingi tańda kórshiles memleket álemniń 195 elimen saýda-sattyq jasaıdy.

11 aıdyń qorytyndysy boıynsha eldiń basty saýda seriktesteri kóshin Qytaı bastap tur. Eki memeleket arasyndaǵy taýar aınalymy 11,2 mlrd dollardan (jalpy kólemniń 19%) asty.

Odan keıingi orynda saýda-sattyqtyń 18% úlesi tıesili Reseı tur. Bul elmen aradaǵy ımport-eksport kólemi 10,6 mlrd dollar boldy.

Sonymen qatar, kóshbasshylardyń úshtigin Qazaqstan túıindedi. Bizdiń el men Ózbekstan arasyndaǵy taýar aınalymy 3,8 mlrd dollardan (jalpy kólemniń 6,5%) asty.

Qamtylyp otyrǵan kezeńde Ózbekstan Qazaqstanǵa 1,3 mlrd dollardyń taýaryn eksporttap, 2,5 mlrd dollardan astam somaǵa taýar ımporttaǵan.

Buǵan deıin habarlaǵanymyzdaı, Ózbekstannyń Dúnıejúzilik saýda uıymyna qosylý protsesi aıaqtalýǵa jaqyn.

Eske salaıyq, keler jyly Ózbekstan $43 mlrd ınvestıtsııany ıgerýdi josparlap otyr.

Buǵan deıin Ózbekstan Senaty eldiń 2025 jylǵa arnalǵan bıýdjetin maquldaǵan bolatyn. Oǵan saı, shoǵyrlandyrylǵan bıýdjet kirisi 431 trln sým (shamamen $33,4 mlrd), shyǵystar 480,5 trln sým ($37,3 mlrd) shamasynda josparlanǵan.