Qazaqstan men EAEO elderi arasyndaǵy ózara saýda kólemi azaıdy
ASTANA. KAZINFORM – 2025 jylǵy qańtar-naýryz aılarynda Qazaqstannyń Eýrazııalyq ekonomıkalyq odaq (EAEO) elderimen ózara saýdasy 6001,1 mln AQSh dollaryn qurap, ótken jyldyń sáıkes kezeńimen salystyrǵanda 6,3 paıyzǵa tómendedi. Bul týraly Ulttyq statıstıka bıýrosy málimdedi.
Atalǵan kezeńde eksport kólemi 1988,1 mln AQSh dollaryn qurap, 11,3 paıyzǵa qysqardy. Import 4013 mln AQSh dollaryn qurap, 3,6 paıyzǵa tómendegen. EAEO elderimen saýda-sattyq qurylymynda negizgi áriptes – Reseı Federatsııasy. Odaq elderimen jalpy saýda kóleminiń 89,3 paıyzy osy elge tıesili. Odan keıin Qyrǵyzstan – 7,3 paıyz, Belarýs – 3,3 paıyz, al Armenııa úlesi – nebári 0,1 paıyzdy quraıdy.Eksporttalatyn negizgi taýarlar qatarynda: – shıki munaı jáne bıtýmınozdy jynystardan alynǵan shıki munaı ónimderi – 52,3 paıyz; – tazartylǵan mys pen óńdelmegen mys qorytpalary – 5,3 paıyz; – mys kenderi men kontsentrattary – 4 paıyz; – ferroqorytpalar – 3,3 paıyz; – bıdaı jáne meslın – 2,3 paıyz bar.
Qazaqstannyń eksporttaǵy basty seriktes elderi: Italııa (25,2%), Qytaı (15,1%), Reseı (9,8%), Nıderlandy (6,4%), Túrkııa (5,1%) jáne Ózbekstan (4,7%).Al, ımport qurylymynda eń kóp úles kelesi taýarlarǵa tıesili: – jeńil avtokólikter – 3,9 paıyz; – dárilik zattar – 3,1 paıyz; – motorly kólik quraldaryna arnalǵan shanaqtar – 2,9 paıyz; – telefon apparattary – 2,3 paıyz; – kólik quraldarynyń bólshekteri men kerek-jaraqtary – 2,2 paıyz.
Resmı málimet boıynsha ımportta negizgi seriktes elder qatarynda Reseı (29,1%), Qytaı (26,8%), Koreıa Respýblıkasy (4,4%), Germanııa (4,2%), AQSh (3%) jáne Túrkııa (2,7%) bar.Sondaı-aq statıstıka derekterine sáıkes, 2025 jylǵy qańtar-naýryz aralyǵynda Qazaqstannyń jalpy syrtqy saýda aınalymy 29272,2 mln AQSh dollaryn qurap, 2024 jyldyń sáıkes kezeńimen salystyrǵanda 7 paıyzǵa qysqarǵan. Atap aıtqanda eksport kólemi – 16361,5 mln AQSh dollaryn qurap, 11,9 paıyzǵa tómendegen, al ımport kólemi – 12911,1 mln AQSh dollaryn qurap, ótken jyldyń deńgeıinde qalǵan.Aıta keteıik, buǵan deıin Ulttyq quryltaı múshesi Jaqsybek Qulekeev Úkimettiń salyq jáne bıýdjet saıasatyna qatysty óz pikirin bildirgen bolatyn.
Sondaı – aq elimizdiń syrtqy saýdadaǵy basty seriktesteri jaıly jazǵan bolatynbyz.