Qazaqstan kýbogy: «Elimaı» men «Qyzyljar» shırek fınalǵa joldama aldy

ASTANA. KAZINFORM - Búgin fýtboldan Qazaqstan kýbogynyń 1/4 fınalyna shyqqan eki komanda anyqtaldy. Qazaqstan kýbogynyń 1/8 fınalyndaǵy alǵashqy kezdesýinde  «Ulytaý» (Jezqazǵan) men «Elimaı» (Semeı) komandalary sheberlik baıqasty.

Oıyn barysynda semeılik komandanyń belsendiligi anyq baıqaldy. Nátıjesinde 39-mınýtta Fessý Plakka esep ashsa, odan keıin Ádilbek Jumahanov 45, 50-mınýtta eki gol soǵyp ketti.
Osylaısha «Elimaı» syrt alańda qarsylasynan 3:0 esebimen basym túsip, shırek fınalǵa berilgen alǵashqy joldamany qaltaǵa basty.

Taǵy bir kezdesýde «Qyzyljar» (Petropavl) men «Qaısar» (Qyzylorda) jasyl alańǵa shyqty.
Eki komanda da bıyl birinshilikti sátsiz bastady. Qazir týrnır kestesinde olar sońǵy oryndardyń birinde tur. Sondyqtan ekeýi de búgingi oıynda shıraq qımyldap, qarsylasyn qapy qaldyrýǵa tyrysty.

Soǵan qaramastan toqsan mınýt túgesilgenshe komandalar bir-birine gol sala alǵan joq. Oıynnyń 91-mınýtynda «Qyzyljar» sapynan Aleksandr Noıok mergendik tanytty.
Qarsylasyn 1:0 esebimen tize búktirgen «Qyzyljar» jarysty jalǵastyrýǵa múmkindik aldy.

Endi shırek fınalda «Elimaı» men «Qyzyljar» kezdesedi. 

Dál qazir «Qaırat» (Almaty) pen «Kaspıı» (Aqtaý) kezdesýiniń birinshi kezeńi aıaqtaldy. Ázirge 2:0 esebimen almatylyq klýb alda keledi.

Al 19:00-de «Turan» (Túrkistan) men «Atyraý» jasyl alańǵa shyǵady.

13 sáýirde «Han táńiri» (Almaty) pen «Ordabasy» (Shymkent), «Oqjetpes» (Kókshetaý) men «Astana», «Jeńis» (Astana) pen «Aqtóbe», «Tobyl» (Qostanaı) men «Jetisý» (Taldyqorǵan) oınaıdy.