Qazaqstan-Koreıa iskerlik keńesi qandaı nátıje berdi

NUR-SULTAN. QazAqparat - 2012 jyldan beri Qazaqstan-Koreıa iskerlik keńesi tıimdi jumys nátıjesin kórsetti. Bul týraly búgin Qazaqstan-Koreıa bıznes forymynda atalǵan Іskerlik keńestiń qazaqstandyq tarapynan teń tóraǵasy Almasadam Satqalıev málim etti, dep habarlaıdy QazAqparat tilshisi.

«Eki el arasyndaǵy qarym-qatynastyń tabysty damýyna 2012 jyly qurylǵan Qazaqstan-Koreıa iskerlik keńesi yqpal etip keledi. Osy jyldary tájirıbe júzindegi ózara is-qımyldardy qoldaý jasaı otyryp, Іskerlik keńes óziniń qajettigi men tıimdiligin kórsete aldy. 2012-2017 jyldar aralyǵynda atalǵan keńestiń 6 otyrysy ótip, 5 mlrd AQSh dollarynan astam somaǵa eseptelgen 12 kelisimge qol qoıyldy», - dedi A. Satqalıev.

Osy oraıda, ol densaýlyq saqtaý, aqparattyq tehnologııalar jáne tsıfrlyq transformatsııa, qurylys, qarjy, saýda, týrızm salalary qamtylǵanyn atap ótti.

«2018 jyly eki el arasyndaǵy taýar aınalymy 3,8 mlrd AQSh dollaryn qurap, bul 2017 jylmen salystyrǵanda eki esege artty», - dedi Іskerlik keńestiń teń tóraǵasy.

Budan buryn habarlanǵandaı, búgin Aqordada QR Prezıdenti Qasym-Jomart Toqaev elimizge memlekettik saparmen kelgen Koreıa Respýblıkasynyń Prezıdenti Mýn Chje Inmen ekijaqty kezdesý ótti.