Qazaqstan Indonezııamen saýda kelisimin jasady

ASTANA. KAZINFORM — Sankt-Peterbýrg qalasynda ótken Joǵary Eýrazııalyq ekonomıkalyq keńes aıasynda Eýrazııalyq ekonomıkalyq odaq pen oǵan múshe memleketter, sondaı-aq Indonezııa Respýblıkasy arasynda Erkin saýda týraly kelisimge qol qoıyldy. Bul týraly Saýda jáne ıntegratsııa mınıstrligi málim etti.

Atalǵan kelisim taýar nomenklatýrasynyń 90 paıyzdan astamyna qatysty bajsyz saýda rejımin engizýdi kózdeıdi. Sonymen qatar, jekelegen taýar pozıtsııalary boıynsha ótpeli kezeńder qarastyrylǵan. Bul kezeńderde ımporttyq kedendik baj mólsherlemeleri 3 jyldan 15 jylǵa deıingi aralyqta kezeń-kezeńimen tómendetiledi. Nátıjesinde Indonezııa naryǵynda Eýrazııalyq ekonomıkalyq odaqqa múshe elderdiń eksporttaýshylary úshin ortasha ımporttyq kedendik baj mólsherlemesi 10,2 paıyzdan 2 paıyzǵa deıin qysqarady.

Bajsyz saýda rejıminiń engizilýi qazaqstandyq aýyl sharýashylyǵy jáne ónerkásip ónimderiniń Indonezııa naryǵyna shyǵýyna qolaıly jaǵdaı qalyptastyrady.

— Kelisimde preferentsııalyq saýda rejımin belgileýmen qatar, saýdany qorǵaý sharalary, taýarlardyń shyǵý tegin aıqyndaý, kedendik yntymaqtastyq, tehnıkalyq saýda kedergileri (TSK), sanıtarııalyq jáne fıtosanıtarııalyq sharalar (SFSh), zııatkerlik menshik quqyqtaryn qorǵaý máseleleri, sondaı-aq quqyqtyq-ınstıtýtsıonaldyq sıpattaǵy taraýlar (jalpy erejeler, daýlardy sheshý, ashyqtyq, qorytyndy erejeler) qamtylǵan. Budan bólek, elektrondyq saýda men taraptar arasyndaǵy ekonomıkalyq yntymaqtastyqqa arnalǵan jeke taraýlar engizilgen, — delingen habarlamada. 

Osylaısha, atalǵan kelisimniń jasalýy Eýrazııalyq ekonomıkalyq odaq elderi men Indonezııa Respýblıkasy arasyndaǵy saýda-ekonomıkalyq baılanystardy odan ári damytýǵa jáne nyǵaıtýǵa yqpal etip, ózara taýar aınalymynyń artýyna múmkindik beredi.

2024 jyly Qazaqstan men Indonezııa arasyndaǵy taýar aınalymy 300,5 mln AQSh dollaryn qurap, aldyńǵy jylmen salystyrǵanda 4,9 paıyzǵa ósti (2023 jyly — 286,4 mln AQSh dollary).

2024 jyly Qazaqstannan Indonezııaǵa eksport kólemi 26,8 paıyzǵa artyp, 120,8 mln AQSh dollaryn qurady. 2024 jyly Indonezııadan Qazaqstanǵa ımport kólemi 6 paıyzǵa tómendep, 179,8 mln AQSh dollaryn qurady.

Buǵan deıin habarlanǵandaı, Indonezııanyń iri kompanııalary ERG jáne Qazmunaıgazben kelissóz júrgizip jatyr.