Qazaqstan halqy Assambleıasynyń el azamattaryna úndeýi
Shara aýqymynda referendým ótkizýdi qoldaǵan Qazaqstan halqy Assambleıasynyń el azamattaryna Úndeýi qabyldandy. QazAqparat Úndeý mátinin jarııalaıdy.
Qymbatty otandastar!
Qadirli azamattar!
Ústimizdegi jyly 23 jeltoqsanda Óskemen qalasynda Tuńǵysh Prezıdent - Elbasy N.Á. Nazarbaevtyń ókilettigin 2020 jyldyń 6 jeltoqsanyna deıin uzartý týraly respýblıkalyq referendým ótkizý jónindegi bastamashy toptyń respýblıkalyq jınalysy bolyp ótti. Respýblıkalyq jınalysqa qatysqan 14 oblys pen Astana jáne Almaty qalalarynan kelgen 850 delegat bastamany bir aýyzdan qoldady.
Olardyń qatarynda tanymal qazaqstandyq aqyn Oljas Súleımenov, general-leıtenant, «Halyq qaharmany» ordeniniń kavaleri Baqytjan Ertaev, Qazaqstan Respýblıkasy Parlamentiniń depýtattary, Qazaqstan halqy Assambleıasynyń músheleri, etnomádenı ortalyqtardyń basshylary, tanymal qoǵam qaıratkerleri bar.
Respýblıkalyq referendým ótkizýge daıyndyq jónindegi Qazaqstannyń barlyq óńirlerin qamtıtyn 320 adamnan quralǵan bastamashy top uıymdastyryldy. Onyń tóraǵasy bolyp Shákárim atyndaǵy Semeı memlekettik ýnıversıtetiniń rektory Erlan Sydyqov saılandy.
Qazaqstan halqy Assambleıasy Tuńǵysh Prezıdent - Elbasy N.Á. Nazarbaevtyń ókilettigin 2020 jyldyń 6 jeltoqsanyna deıin uzartý týraly respýblıkalyq referendým ótkizý jónindegi bastamany bir aýyzdan qabyldaıdy jáne tolyq qoldaıdy.
Biz munyń memlekettiń keleshekte turaqty damýy úshin, elimizdiń álemdegi básekege qabilettiliginiń artýy úshin jáne Qazaqstan halqynyń ıgiligi men ósip órkendeýi úshin qajet ekendigine aıqyn senimdimiz.
Qazaqstan halqy Assambleıasy 1995 jyly Nursultan Ábishuly Nazarbaevtyń Qazaqstan Respýblıkasy Prezıdenti retinde ókilettiligin 2000 jylǵa deıin uzartý jónindegi jalpyhalyqtyq referendým ótkizýge bastamashylyq jasaǵany belgili.
Qazaqstan halqynyń ekonomıkalyq, áleýmettik progress jolynda, demokratııalyq memleket qurýda túbegeıli órleý jolyna túsýine múmkindik bergen bul qadamnyń durystyǵyn tarıh dáleldedi.
Búginde Qazaqstan Elbasynyń basshylyǵymen aýqymdy álemdik ekonomıkalyq daǵdarysty nyq eńsergen kezde, elimizde nátıjesi Qazaqstan halqynyń talaı urpaǵynyń taǵdyryn aıqyndaıtyn jedeldetilgen ındýstrıaldy-ınnovatsııalyq damýdyń jaýapty kezeńine aıaq basqan kezde, Qazaqstan halqy Assambleıasy - eldi, halyqty qandaı qyıly jaǵdaılardan abyroımen alyp shyqqan, tarıhı ólshemdegi mindetterdi sheshý qabiletin isimen dáleldegen kóshbasshyǵa sený durys dep biledi.
Qazaqstan halqy Assambleıasynyń XVI sessııasynda, onyń birqatar músheleri óz baıandamalarynda elimizdiń Tuńǵysh Prezıdenti - Elbasynyń ókilettiligin memlekettik strategııalyq baǵdarlamalar aıaqtalǵanǵa deıin uzartý týraly bastama kótergen bolatyn. Baıandamalarda Nursultan Ábishulynyń Táýelsizdigimizdi ornatýdyń basynda turǵandyǵy, qazaqstandyq damý jolyn aıqyndaǵan, taǵdyrly sheshimderdiń onyń atymen tikeleı baılanysty ekendigi atap ótildi. Tarıhı ólshem boıynsha qysqa merzim, nebári jıyrma jyldyń ózinde jańa memleket qurylyp, Qazaqstan tańdanarlyq jetistikterge qol jetkizdi jáne bul oraıda bizge osy damý qarqynyn joǵaltýǵa bolmaıdy. 2030 - Strategııasynda jáne 2020 jylǵa deıingi Strategııalyq damý josparynda kórinis tapqan beldi mindetter - Qazaqstannyń keleshektegi ósip-órkendeýiniń kepili. Assambleıa osy baǵdarlamalardyń júzege asyrylýyn Elbasynyń basshylyǵymen ǵana kóredi.
Muny, Qazaqstannyń EQYU-ǵa tóraǵalyǵy, Qazaqstannyń Táýelsizdik jyldary qol jetkizgen áleýmettik-ekonomıkalyq jáne qoǵamdyq saıası jetistikteriniń aıshyqty moıyndalýy bolǵan 56 qatysýshy el biraýyzdan qoldaý bildirgen Astanaǵy Sammıttiń ótkizilýi pash etti. EQYU-ǵa tóraǵalyq Qazaqstannyń Nursultan Ábishulynyń basshylyǵymen óristi memleket retinde ornyqqanyn ǵana emes, onyń ǵalamdyq qaýipsizdik pen áriptestikti qamtamasyz etý isine laıyqty úles qosqan, abyroıly aımaqtyq derjavaǵa aınalǵanyn kórsetti. Bul jańa Qazaqstannyń sáýletshisi men qurylysshysy - Prezıdent N.Á.Nazarbaevtyń keremet qyzmetiniń jarqyn nátıjesi, onyń álemdik ólshemdegi kóshbasshy ekendiginiń aıqyn dáleli!
Bul - bizdiń Prezıdentimiz ben Qazaqstan halqynyń sózsiz jeńisi!
EQYU Sammıtiniń sátti ótkizilýi azamattardyń patrıottyq sezimin asqaqtatyp, bizdiń qoǵamnyń birligin nyǵaıta tústi, elimizdiń ári qaraı ekonomıkalyq jáne saıası órkendeýiniń qýatty negizi boldy.
Biz barlyǵymyz birlese otyryp, Elbasynyń basshylyǵymen baqýat, ósip-órkendegen jáne barsha álemge tanymal - QAZAQSTANDY quratynymyzǵa Assambleıanyń senimi mol.
Qazaqstan halqy Assambleıasy qoǵamdy Tuńǵysh Prezıdenttiń jáne ol júrgizip kele jatqan saıasattyń mańyna toptasýǵashaqyrady. Bul eldiń bolashaǵy úshin qajet, óıtkeni reformalardyń jemisti bolýy tańdap alynǵan baǵyttan aınymaýmen baılanysty. Bul memlekettiń turaqty damýy jáne qoǵamdyq kelisim men beıbitshil saıasatty saqtaý úshin mańyzdy.
Bizdiń balalarymyz úshin, erteńgi kúnge degen senim úshin, qazaqtyń berekeli jeriniń tynyshtyǵy úshin, biz barsha Qazaqstan halqyn referendým týraly bastamany qoldap - Tuńǵysh Prezıdent, Elbasy - Nursultan Ábishuly Nazarbaevqa jalpyhalyqtyq qoldaý bildirýge shaqyramyz.
Bizdiń ortaq otanymyz - Qazaqstan Respýblıkasy gúldene bersin!
Qazaqstan halqy Assambleıasy
2010 jylǵy 25 jeltoqsan, Almaty qalasy
