Qazaqstan ettiń alǵashqy partııasyn Iranǵa eksporttady
Qorǵaljyn aýdanynyń Sabyndy aýylyndaǵy «Astana Agroprodýkt» JShS Qazaqstanda birinshi bolyp Iran eline et eksporttaý boıynsha kelisimshartqa qol qoıyp, alǵashqy partııasyn jetkizdi.
«Qazaqstannan jetken ettiń alǵashqy partııasy Iran eline Aqmola oblysynan jóneltildi. Aıta ketý kerek, Iran - musylman memleketi bolǵandyqtan, onda etke degen suranys joǵary. Bul degenimiz «Astana Agroprodýkt» JShS shyǵaratyn ettiń halal ónimderiniń joǵary standartyna saı ekenin bildiredi», - dep atap ótti Aqmola oblysy ákiminiń orynbasary Marat Iǵalıev.
Aqmola oblysynyń kásipkerlik jáne ónerkásip basqarmasynyń málimeti boıynsha, «Astana-Agroprodýkt» JShS et kombınaty - óńirdegi et ónimderin óńdeıtin iri kásiporyn sanalady.
«Kásiporyn nemistiń ınnovatsııalyq tehnologııasyn qoldanady. Kásiporyn et ónimderin esporttaýǵa baǵyttalǵan, básekege saı, joǵary sapaly «Bakara» brendimen et jáne shujyq ónimderin shyǵarady», - deıdi basqarmadaǵylar.
Elbasynyń Astana aınalasynda azyq-túlik beldeýin damytý týraly tapsyrmasyn júzege asyrý sheńberinde «Bakara» et kombınaty elordanyń saýda oryndaryna et ónimderin usynyp, astanalyqtar tarapynan joǵary suranysqa ıe bolyp otyr.
«2014 jyldan bastap «Astana-Agroprodýkt» JShS Máskeý sýpermarketterine et delıkatesterin jetkizý boıynsha Reseı naryǵyna shyqty. Al, QR agroónerkásip keshenin damytý boıynsha 2017-2021 jyldarǵa arnalǵan memlekettik baǵdarlamany júzege asyrý arqyly otandyq aýyl sharýashylyǵy taýarlaryn óndirýshiler úshin jańa naryqty ıgerýde. Óndiristi «halal» standartymen sertıfıkattaǵan «Astana Agroprodýkt» JShS Qazaqstanda birinshi bolyp Iran eline et ónimderin jetkizý boıynsha kelisimshart jasady», - dep tolyqtyrdy vedomstvodan.
Kelisimshart tórt aıǵa, ıaǵnı 700 tonna et eksporttaýǵa arnalǵan. Qazirgi kezde aldyn ala aqshasy alynyp, 60 tonna et jóneltilip otyr.
«Naýryz aıynyń sońyna deıin taǵy jóneltiledi. Al, sáýir aıynan bastap aı saıyn 200 tonnadan et eksporttalady. Iran - musylman eli bolǵandyqtan, mal soıý protsesin osynda arnaıy kelgen molda baqylap otyrady. Et vakýýmǵa salynyp, salqyndatylǵan kúıde Iranǵa jóneltiledi. Alǵashqy partııa ırandyqtarǵa jetkizildi. Et sapasy men dámi olarǵa qatty unady. Áriptesterimizdiń aı saıynǵy etke degen suranysy - 1000 tonna. Sondyqtan, aldaǵy ýaqytta eksport kólemin arttyratyn bolamyz», - deıdi «Bakara» kompanııalar tobynyń quryltaıshysy Serik Rahymbaev.
Onyń aıtýynsha, kompanııa - Qytaıǵa et ónimderin jetkizý boıynsha attestatsııalaý sharalarynan ótip jatqan bes kompanııanyń biri.
