Qazaqstan elshisi Chehııa prezıdentine senim gramotalaryn tapsyrdy
ASTANA. KAZINFORM — Praga Qamalynda Qazaqstan Respýblıkasynyń elshisi Qaırat Ábdirahmanov Cheh Respýblıkasynyń prezıdenti Petr Pavelge senim gramotalaryn tapsyrǵany belgili boldy. Bul týraly QR SІM baspasóz qyzmeti habarlady.
Saltanatty rásim aıasynda qazaq dıplomaty men cheh memleket basshysy suhbattasyp, ekijaqty qatynastardyń joǵary deńgeıin rastap, olardy odan ári tereńdetýge ózara qyzyǵýshylyqtaryn bildirdi.
— Taraptar saýda-ekonomıkalyq jáne ınvestıtsııalyq yntymaqtastyq úshin qolaıly jaǵdaılar qalyptastyrý, sondaı-aq mádenı-gýmanıtarlyq baılanystardy damytý máselelerine erekshe nazar aýdardy. Óńirlik jáne halyqaralyq kún tártibindegi ózekti máseleler boıynsha pikir almasý barysynda jahandyq qaýipsizdik pen turaqtylyqty nyǵaıtý múddesinde Birikken Ulttar Uıymy men Eýropadaǵy qaýipsizdik jáne yntymaqtastyq uıymy aıasyndaǵy ózara is-qımyldyń mańyzdylyǵy atalyp ótti. Eýropalyq odaq pen Ortalyq Azııa arasyndaǵy yntymaqtastyqtyń joǵary qarqyny qanaǵattanýshylyqpen aıtyldy, — delingen habarlamada.
Elshi cheh tarapynyń nazaryn Qazaqstandaǵy jańǵyrýdyń jańa kezeńine aýdaryp, Prezıdent Qasym-Jomart Toqaevtyń «Turkistan» gazetine bergen jańa jyldyq suhbatynda aıqyndalǵan ornyqty ekonomıkasy, turaqty saıası júıesi jáne qoǵamdyq ıgilikterdi ádil bólý qaǵıdaty bar quqyqtyq memleket qurý basymdyqtaryn atap ótti. Cheh kásipkerleri Qazaqstandaǵy ekonomıkalyq ózgeristerge, ásirese energetıka jáne kommýnaldyq sharýashylyq salalaryna erekshe qyzyǵýshylyq tanytyp otyr. Sebebi, cheh kompanııalary dál osy salalarǵa qajetti, resýrsty únemdeıtin jáne ekologııalyq taza ozyq tehnologııalarmen jabdyqtalǵan.
Osy jáne ózge de ózara tıimdi qazaq-cheh yntymaqtastyǵynyń baǵyttary boıynsha bıik jáne joǵary deńgeıdegi kezdesýlerdi ázirleý maqsatynda eki eldiń úkimetteri, isker jáne qoǵamdyq toptary jelisi arqyly úılestirilgen jumys jalǵastyrylatyn bolady.
Budan buryn Qasym-Jomart Toqaev AQSh pen Bolgarııa elshilerinen senim gramotalaryn qabyldaǵanyn jazǵan edik.