22 jyldan keıin Qazaqstannyń jańa nysany ıÝNESKO tizimine enýi múmkin
ASTANA. KAZINFORM – Koreıa Respýblıkasynyń Pýsan qalasynda ótip jatqan ıÝNESKO-nyń Dúnıejúzilik muralar komıtetiniń 48-shi sessııasyna qatysýdamyz, dep jazdy búgin Qazaqstan Respýblıkasy Prezıdenti Ákimshiligi Basshysynyń birinshi orynbasary Erlan Qarın óziniń instagram paraqshasynda.
Osyǵan deıin habarlaǵanymyzdaı, sessııa jumysy 19 shildede bastaldy. Onyń ashylý rásimine Koreıa Respýblıkasynyń Prezıdenti Lı Chje Men jáne ıÝNESKO-nyń Bas dırektory Haled ál-Ananı qatysty.
29 shildege deıin jalǵasatyn jahandyq jıynǵa Dúnıejúzilik mádenı jáne tabıǵı murany qorǵaý týraly konventsııaǵa qatysýshy 196 memlekettiń úsh myńǵa jýyq delegaty jınalǵan. Sondaı-aq halyqaralyq uıymdar men sarapshylar qaýymdastyǵynyń ókilderi de qatysyp jatyr. Osy kúnderi Komıtet ıÝNESKO-nyń Dúnıejúzilik muralar tizimine engizýge usynylǵan 30 jańa nomınatsııany qaraıdy. Onyń qatarynda Qazaqstannyń «Mańǵystaýdyń jartasty meshitteri jáne olarmen baılanysty kıeli oryndar» nomınatsııasy da bar.
Eske sala keteıik, bul bastamany Qasym-Jomart Kemeluly Toqaev Ulttyq quryltaıdyń Atyraýda ótken otyrysynda kótergen bolatyn.
-Sondyqtan, bul jıynnyń biz úshin mańyzy zor. Sebebi, sońǵy 22 jylda ıÝNESKO-nyń bedeldi tizimine ulttyq nomınatsııa boıynsha bizdiń elden birde-bir nysan engizilmegen edi. Bir aı buryn ICOMOS uıymynyń halyqaralyq sarapshylary ulttyq nomınatsııadaǵy bes nysanǵa (Beket ata, Shopan ata, Qaraman ata, Shaqpaq ata, Sultan Úpi) qatysty oń baǵasyn berip, rezolıýtsııanyń jobasyna qoldaý bildirgen edi. Biraq, oń sheshim shyǵarylǵan jaǵdaıda da, bes nysan ıÝNESKO tizimine túgeldeı qosyla ma, joq pa degen suraq áli de ózekti bolyp tur. Óıtkeni, bertingi ǵasyrlarǵa qarasty bolǵandyqtan, Beket ata meshitine qatysty áli de talqylaýlar júrip jatyr,-dep jazdy Erlan Qarın.
Sondaı-aq ol aldaǵy kúnderi bári aıqyndalatynyn jetkizdi.
-Pýsannan jaqsy jańalyqtar bolady dep oılaımyn,-dedi Prezıdent Ákimshiligi Basshysynyń birinshi orynbasary.
Aıta keteıik, osyǵan deıin Mańǵystaýdyń jartasty meshitteri ıÝNESKO-nyń Dúnıejúzilik muralar tizimine enetini týraly jazdyq.
