Qazaqstan dári-dármek naryǵynda ımportqa qanshalyqty táýeldi
Densaýlyq saqtaý mınıstrligi elimizdegi dárilik zattar men medıtsınalyq buıymdar naryǵyna qatysty túsinik berdi, dep habarlaıdy Kazinform.
«Qazaqstan Respýblıkasy Strategııalyq josparlaý jáne reformalar agenttiginiń deregi boıynsha 2022 jyly farmatsevtıka salasynyń óndirisi 162,6 mlrd teńge boldy. 2023 jyldyń 11 aıynda óndiris kólemi 131,0 mlrd teńgege jetti. Sonymen qatar Qarjy mınıstrliginiń derekterine qaraǵanda, 2022 jyly eksport kólemi 32,2 mln AQSh dollary, ımport 1,7 mlrd AQSh dollary shamasynda boldy. Al 2023 jyldyń 11 aıynda farmatsevtıka ónerkásibiniń eksporty 14,4 mln AQSh dollaryn, al ımport 1,6 mlrd AQSh dollaryn qurady», - delingen Densaýlyq saqtaý mınıstrliginiń Kazinform agenttigine bergen jaýabynda.
Farmatsevtıkalyq naryq kólemi 2022 jyly 922 mlrd teńge (2 mlrd AQSh) boldy.
«2023 jylda farmatsevtıka salasynda 8 jańa óndiris ashyldy. 2024 jylda taǵy 7 jańa óndiris ashý josparlanǵan», - dep atalyp ótken vedomstvo habarlamasynda.
Sonymen qatar mınıstrlik Qazaqstanda dári-dármekpen qamtamasyz etilý deńgeıi jaıynda túsinik berdi. Qazirgi kezde ambýlatorııalyq deńgeıde patsıentter 126 nozologııa boıynsha tegin preparattarmen qamtamasyz etiledi, ıaǵnı tegin medıtsınalyq kómektiń kepildendirilgen kólemi aıasynda 56 nozologııa jáne MÁMS júıesinde 70 nozologııa eskerilgen. Osy rette, nozologııalardyń sany 2019 jylǵy 50-den 2022 jyly 126-ǵa deıin ósti. Bul óz kezeginde 3,8 mln-nan astam patsıentti nemese 2019 jylmen salystyrǵanda 54 paıyzǵa artyq qamtýǵa múmkindik berdi.
