Qazaqstan bıýdjetiniń áleýmettik shyǵyny ósip keledi

ASTANA. KAZINFORM — Ekonomıkalyq zertteýler ınstıtýty Qazaqstannyń 2022–2024 jyldardaǵy memlekettik bıýdjetiniń áleýmettik shyǵyndaryn eseptep kórdi. 

Qazaqstanda memlekettik bıýdjettiń áleýmettik shyǵyndaryna bilim berý, densaýlyq saqtaý, áleýmettik kómek pen áleýmettik qamtamasyz etý, mádenıet, sport, týrızm jáne aqparattyq keńistik, turǵyn úı-kommýnaldyq sharýashylyq salalaryndaǵy shyǵyn kiredi.

2022-2024 jyldary Qazaqstannyń memlekettik bıýdjetinen áleýmettik shyǵyn 41,9%-ǵa: 2022 jyly 13,1 trln teńgeden (barlyq baǵyt boıynsha shyǵynnyń 61,0%-y, JІÓ-niń 12,7%-y) 2024 jyly 18,6 trln teńgege deıin (barlyq baǵyt boıynsha shyǵynnyń 61,4%-y, JІÓ-niń 13,8%-y) artqan.

Bilim berý salasyna jumsalǵan shyǵyn 48,3%-ǵa ulǵaıǵan — 2022 jyly 4,5 trln teńge bolsa (barlyq áleýmettik shyǵynnyń 34,5%-y), 2024 jyly 6,7 trln teńgege deıin (36,0%) ósken.

Densaýlyq saqtaý salasyna ketken shyǵyn 18,4%-ǵa ósti — 2022 jyly 2,1 trln teńgeden (16,1%) 2024 jylǵy 2,5 trln teńgege deıin (13,4%) ózgergen.

Áleýmettik kómek pen áleýmettik qamtamasyz etý boıynsha shyǵyn 34,2%-ǵa kóbeıgen — 2022 jylǵy 4,5 trln teńgeden (34,3%) 2024 jylǵy 6 trln teńgege deıin (32,4%).

Mádenıet, sport, týrızm jáne aqparattyq keńistik boıynsha shyǵyn 45,5%-ǵa kóbeıdi — 2022 jyly 0,7 trln teńgeden (5,3%) 2024 jyly 1,0 trln teńgege deıin (5,4%).

Sonymen birge, turǵyn úı-kommýnaldyq sharýashylyqqa jumsalǵan shyǵyn 82,3%-ǵa kóbeıgen — 2022 jylǵy 1,3 trln teńgeden (9,9%) 2024 jylǵy 2,4 trln teńgege deıin (12,8%) ósim bar.

Buǵan deıin elimizdegi bıýdjet júıesin qandaı ózgerister kútip turǵany habarlanǵan edi.