Qazaqstan birqatar elmen sottalǵandardy berý boıynsha kelisimge kelmek

NUR-SULTAN. QazAqparat – QR Parlamenti Senatynyń jalpy otyrysynda «Qazaqstan men Mońǵolııa arasyndaǵy sottalǵan adamdardy berý týraly shartty ratıfıkatsııalaý týraly» Zańy qabyldandy, dep habarlaıdy QazAqparat tilshisi.

Shartqa 2018 jyly naýryzda Nur-Sultan qalasynda qol qoıyldy.

«Qujat eki memleket arasynda sottalǵan adamdardy jazasyn odan ári óz el elinde óteý úshin olarmen almasý múmkindigimen baılanysty máselelerdi retteıdi. Shartpen adamdy berýdiń naqty jaǵdaılary qarastyrylǵan», - dedi QR Bas prokýrorynyń orynbasary Bolat Dembaev.

Atap aıtqanda, sottalǵan adam qabyldaýshy taraptyń azamaty bolýy tıis. Sonymen qatar, jasalǵan áreket eki jaqtyń zańy boıynsha qylmys dep sanalýy, ótelmegen jaza keminde bir jyldy quraýy kerek.

Belgili bolǵandaı, shart talaptaryn iske asyrý úshin ortalyq organdar aıqyndaldy. Osy oraıda QR Bas prokýratýrasy men Mońǵolııanyń Ádilet jáne ishki ister mınıstrliginiń ózara is-qımyly eskerilgen.

Budan bólek, sottalǵandardy berýden bas tartý negizderi de kózdelgen. Mysaly, el egenmendigine, qaýipsizdigine, qoǵamdyq tártipke nuqsan keltiretin bolsa, ulttyq zańnamanyń irgeli qaǵıdattaryna qaıshy keledi.

B. Dembaevtyń aıtýynsha, qazirgi tańda Mońǵolııada jazasyn ótep jatqan Qazaqstan azamattary joq. Al elimizde Mońǵolııanyń 5 azamaty jazasyn ótep jatyr.

«Osyǵan uqsas shartty elimiz 21 memleketpen bekitken. Jaqynda osyndaı qujatqa Ózbekstan, Vetnam, Kıpr, Domınıkan jáne basqa da eldermen qol qoıý josparlanǵan», - dedi Bas prokýrordyń orynbasary.