Qazaqstan-Amerıka suhbattastyǵy da belsendi jalǵasyp keledi — Toqaev
ASTANA. KAZINFORM — Kóptegen memleket Qazaqstanmen dostyq qatynas ornatyp, tıimdi yntymaqtastyqty nyǵaıtýǵa umtylady. Bul týraly Prezıdent Qasym-Jomart Toqaev Qazaqstan halqyna Joldaýy barysynda aıtty.
— Tsıfrlandyrý jáne jasandy ıntellekt dáýirinde memleketimizdiń ulttyq strategııalyq múddesine saı keletin teńgerimdi ári syndarly syrtqy saıasaty áleýmettik-ekonomıkalyq turǵydan ornyqty damýymyzǵa zor yqpal etedi dep senemin. Kóptegen memleket Qazaqstanmen dostyq qatynas ornatyp, tıimdi yntymaqtastyqty nyǵaıtýǵa umtylady. Munyń ózi, birinshi kezekte, elimizdiń halyqaralyq arenadaǵy abyroı-bedeli joǵary ekenin jáne ózgeler bizben sanasatynyn kórsetedi. Biz mańyzdy halyqaralyq problemalardy sheshýge óz úlesimizdi qosyp kelemiz. Qazaqstanmen qarym-qatynas ornatýǵa múddeli alys-jaqyn elderdiń bárimen yntymaqtastyǵymyzdy baǵalaımyz. Jaqynda men Qytaıǵa resmı saparmen bardym. Onda máńgi strategııalyq seriktestik rýhynda damyp kele jatqan ekijaqty qarym-qatynastyń barlyq máseleleri boıynsha tabysty kelissózder ótti. Meniń Túrkııaǵa jáne Qyrǵyzstanǵa saparlarym da sátti boldy. Osy jyldyń sońyna qaraı men Reseıge jáne Ózbekstanǵa baramyn. Astanada Ázerbaıjan, Armenııa, Túrikmenstan basshylaryn qarsy alýǵa daıyndalyp jatyrmyz. Sondaı-aq Azııanyń, Eýropanyń, Afrıkanyń birqatar memleket basshylarymen kezdesip, kelissóz júrgizý josparlanǵan, — dedi Qasym-Jomart Toqaev.
Prezıdenttiń aıtýynsha, Qazaqstan-Amerıka suhbattastyǵy da belsendi jalǵasyp keledi.
— Eýropa odaǵymen san salaly baılanystarymyzdy kúsheıtip jatyrmyz. Bıyl aıtýly datalarǵa toly jyl boldy. Eń bastysy, Ekinshi dúnıejúzilik soǵystyń aıaqtalǵanyna 80 jyl toldy. Máskeýde jáne Beıjińde ótken saltanatty is-sharalar adamzat tarıhyndaǵy eń surapyl soǵystyń ondaǵan mıllıon qurbany álem halqynyń jadynda máńgi qalatynyn ańǵartty. Sondaı-aq bárimizdi sol bir qandy qyrǵynǵa qaıta baǵa berýden jáne jańa dúnıejúzilik soǵys bastaýǵa umtylýdan aýlaq bolýǵa shaqyrdy. Barlyq el ósip-órkendeý úshin beıbitshilikti saqtap, ortaq mámilege kele bilýi kerek. Myń shyj-byjdan bir siz-biz artyq. Sol sebepti Qazaqstan Alıaskada ótken Reseı-AQSh sammıtiniń nátıjesine, sondaı-aq Vashıntonda Prezıdent Tramptyń araǵaıyndyǵymen Ázerbaıjan men Armenııanyń beıbitshilik týraly deklaratsııaǵa qol qoıǵanyna qoldaý bildirdi, — dedi Memleket basshysy.
Aıta ketelik Prezıdent álemde tranzıt úshin báseke kúsheıip bara jatqanyn aıtqan edi.