Qazaqstan alıýmınıı dóńgelek dıskilerin óndirýdi qolǵa almaq

ASTANA. KAZINFORM - QR Premer-mınıstriniń birinshi orynbasary Roman Sklıardyń qatysýymen Qazaqstanda alıýmınıı dóńgelek dıskilerin óndirý jónindegi memorandýmǵa qol qoıyldy, dep habarlaıdy Úkimettiń resmı saıty.

Ondaǵy málimetterge qaraǵanda, QR Premer-mınıstriniń birinshi orynbasary Roman Sklıar amerıkalyq Open Element kompanııasynyń bas dırektory Mýstafa Akkarımen jáne koreıalyq Hands Corporation tóraǵasy Son Hen Chanpen kezdesti.

Kezdesý barysynda ınvestıtsııalyq yntymaqtastyq jáne Qazaqstanda alıýmınıı dóńgelek dıskilerin óndirý boıynsha birlesken kásiporyn qurý jobasyn júzege asyrý máseleleri qarastyryldy.

Joba qazaqstandyq Astana Motors kompanııasynyń, sondaı-aq halyqaralyq seriktester – Open Element (AQSh) jáne Hands Corporation (Koreıa Respýblıkasy) qatysýymen zamanaýı joǵary tehnologııalyq zaýyt salýdy kózdeıdi.

Ol avtomobıl ónerkásibinde lokalızatsııany tereńdetýdi, ımportqa táýeldilikti azaıtýdy, sabaqtas salalardy damytýdy jáne Qazaqstannyń ónerkásiptik áleýetin nyǵaıtýdy qamtamasyz etedi. Jańa kásiporyn Qazaqstanda alıýmınıı dóńgelek dıskilerin óndirý boıynsha tolyq tehnologııalyq tsıklmen, onyń ishinde ozyq ınjenerlik jáne óndiristik sheshimderdi transferleýdi qamtıtyn alǵashqy zamanaýı óndiris bolady.

Sheteldik seriktester Qazaqstannyń jobany júzege asyrý alańy retinde tańdalýy eldegi avtomobıl óndirisiniń turaqty ósýimen baılanysty ekenin atap ótti.

Kezdesý qorytyndysy boıynsha birlesken kásiporyn qurý týraly úshjaqty memorandýmǵa qol qoıyldy.

Memorandýmǵa qol qoıý rásimine Astana Motors negizin qalaýshy Nurlan Smaǵulov, Astana Motors bas dırektory Beknýr Nesipbaev, Open Element negizin qalaýshy jáne bas dırektory Mýstafa Akkarı, Hands Corporation dırektorlar keńesiniń tóraǵasy Syn Hen Chan, sondaı-aq Qazaqstannyń Avtokólik Odaǵynyń prezıdenti Anar Makasheva qatysty.

Bul jobany júzege asyrý Qazaqstannyń tek ishki naryq úshin ǵana emes, sonymen qatar óńirlik naryqtar úshin de iri avtokomponentter óndirýshisi jáne jetkizýshisi róline kóshý jónindegi uzaqmerzimdi strategııasynyń bir bóligi bolyp sanalady.

Osyǵan deıin Qazaqstanda 2025 jyly 33 jańa ónerkásiptik kásiporyn iske qosylatyny týraly jazdyq.