Qazaqstan alǵash ret bitimgerlik mindetin derbes oryndaýǵa kiristi - Prezıdent
ASTANA. KAZINFORM — Memleket basshysy Ulttyq bitimgerlik kontıngentiniń áskerı qyzmetshilerimen kezdesti. Bul týraly Aqordanyń baspasóz qyzmeti habarlady.
Qasym-Jomart Toqaev Ulttyq bitimgerlik quram sapynda tabysty qyzmet atqaryp, halyqaralyq qaýipsizdikti nyǵaıtýǵa zor úles qosqan ofıtserlermen jáne sarbazdarmen kezdesti. Prezıdent elimizge júktelgen jaýapty mindetti joǵary deńgeıde atqaryp kelgen áskerıler erlik pen batyldyqtyń ozyq úlgisin kórsetkenin, sol arqyly Ulttyq armııamyzdyń, tutas memleketimizdiń bedeli kóterilgenin atap ótti.
– Bitimger bolý – beıbitshiliktiń elshisi bolý degen sóz. Bul – úlken abyroı ári zor jaýapkershilik, naǵyz erjúrek jaýyngerlerdiń qolynan keletin is. Barshańyzǵa shynaıy rızashylyǵymdy bildiremin. Qazir álemdegi jaǵdaı asa kúrdeli ekenin bilesizder. Túrli qaqtyǵystar bolyp jatyr. Ókinishke qaraı, onyń bárin kelissóz arqyly sheshý múmkin bolmaı tur. Mundaı kezde bitimgerlik mıssııalary aıryqsha ról atqarady. Qazaqstan – beıbit el. Biz álemde turaqtylyq ornatýdy kózdeıtin barlyq bastamany qoldaımyz, – dedi Joǵarǵy Bas qolbasshy.
Prezıdenttiń aıtýynsha, elimizdiń qarýly kúshteri 2014 jyldan beri Birikken Ulttar Uıymynyń bitimgerlik qyzmetine óz úlesin qosyp keledi. 80 azamat baıqaýshy jáne shtab ofıtseri retinde birneshe mıssııaǵa atsalysyp, 700-ge jýyq áskerı qyzmetshi BUU-nyń arnaıy operatsııalaryna qatysqan. Memleket basshysy olardyń ishinde Álııa men Mánshúktiń, Hıýazdyń jolyn jalǵaǵan jaýjúrek arýlar da bar ekenin atap ótti.
Qasym-Jomart Toqaev kóptegen el bitimgerlik kúshterge qosylýǵa umtylatynyna, biraq bárine birdeı senim artyla bermeıtinine nazar aýdardy. Qazaqstanǵa osyndaı múmkindik berilip otyrǵanyn, bul rette ulttyq armııamyz byltyr taǵy bir tarıhı qadam jasaǵanyn aıtty.
– Qazaqstan alǵash ret bitimgerlik mindetin derbes oryndaýǵa kiristi. Golan jotalaryndaǵy operatsııa aıasynda Birikken Ulttar Uıymymen qarym-qatynasymyz múlde jańa deńgeıge kóterildi. Biz tolyqqandy bitimgerlik kúshteri bar elderdiń qataryna qosyldyq. Qazaqstan – osy salada mol tájirıbe jınaqtaǵan Ortalyq Azııadaǵy birden-bir memleket, – dedi Prezıdent.
Joǵarǵy Bas qolbasshy sarbazdardy mańyzdy mıssııalarǵa daıarlaý isine aıryqsha nazar aýdardy. Onyń aıtýynsha, az ýaqyt ishinde áskerı qyzmetshilerdi túrli daǵdylarǵa beıimdep, olardy halyqaralyq standarttarǵa saı qural-jabdyqtarmen túgel qamtamasyz etý úshin sapaly jumys atqaryldy.
– Bul áskerimizdiń asa kúrdeli mindetterdi oryndaýǵa qabiletti ekenin kórsetedi. Sizder Sırııa daǵdarysynyń sheshýshi sátinde utymdy ári batyl áreket jasadyńyzdar. Qazaqstan armııasynyń kásibı deńgeıi joǵary ekenin dáleldep berdińizder. Sol kúnderi qazaq jaýyngeriniń asqaq rýhy men qaısarlyǵyna búkil álem kýá boldy. Sizder qaýipti aımaqtarda jumys istep, eren erlik kórsetip, mol tájirıbe jınap keldińizder. Endi osy tájirıbeni bólisip, basqa da áskerı qyzmetshilerdi úıretý qajet. Bitimgerlik mıssııa kezinde meńgergen jańa daǵdylardy elimizdiń ásker daıarlaý júıesine engizý óte mańyzdy, – dedi Memleket basshysy.
Qazir elimizdiń 158 azamaty Afrıka jáne Taıaý Shyǵys aımaǵynda bitimgerlik qyzmette júr. Bolashaqta Birikken Ulttar Uıymy aıasynda ótip jatqan basqa da mıssııalarǵa qatysýdy josparlap otyrmyz. Osylaısha, Qazaqstan jer júzindegi beıbitshilik pen kelisimdi nyǵaıtýǵa belsendi túrde atsalysa bermek.
– Qarýly kúshter – elimizdiń egemendigi men táýelsizdiginiń basty tirekteriniń biri. Eń aldymen, sarbazdary men ofıtserleriniń rýhy asqaq, kásibı deńgeıi joǵary, jaýyngerlik mashyǵy minsiz, tártip pen tazalyqty múltiksiz saqtaıtyn ásker qýatty bolady. Armııa – qaısarlyqqa baýlıtyn, jigerdi janıtyn naǵyz mektep. Sizder azamattyq borysh pen áskerı antqa adaldyq tanytyp, shynaıy patrıotızmniń úlgisin kórsettińizder. Minsiz qyzmetterińiz óskeleń urpaqqa ónege. Memleket basshysy retinde men qaýipsizdik jáne quqyq qorǵaý salasyna árdaıym aıryqsha kóńil bólemin. Jaqynda Aqordada arnaýly jasaqtar arasyndaǵy bedeldi halyqaralyq jarystan júldemen oralǵan kúshtik qurylym qyzmetkerlerin marapattadyq. Jalpy, áskerı bólimder men kúshtik qurylymdardyń bedeli men daıarlyq deńgeıi edáýir ósti. Quqyq qorǵaý jáne arnaýly organdar qylmyspen kúreste, terrorızm men esirtki bıznesiniń jolyna tosqaýyl qoıýda tıimdiligin kórsetip keledi. Alaıda bosańsýǵa múlde bolmaıdy. Aldymyzda memleketimizdiń qorǵanys qabiletin nyǵaıtý mindeti tur, – dedi Memleket basshysy.
Prezıdent Qazaqstan ómir súrýge qolaıly jáne qaýipsiz el bolýǵa tıis dep sanaıdy. Bul úshin memleket tarapynan barlyq qajetti shara qabyldanyp jatyr.
– «Zań men tártip», otanshyldyq pen jaýapkershilik – áskerı qyzmetshilerge ǵana emes, elimizdiń barlyq azamattaryna ortaq asa mańyzdy qundylyqtar. Osy jasampaz qasıetter qoǵamda jan-jaqty dáriptelýge tıis. Sebebi biz qazir bárimiz bir el bolyp Ádiletti, Qaýipsiz jáne Qýatty Qazaqstandy quryp jatyrmyz, – dedi Memleket basshysy.
Sóz sońynda Qasym-Jomart Toqaev áskerı qyzmetshilerge jaýyngerlik mindetterin minsiz atqarǵany úshin taǵy da alǵys aıtyp, olarǵa tilekshi bolǵan jaqyndary men otbasylaryna rızashylyǵyn bildirdi.
– Qazaqta «Erdiń isi – eldiń isi» degen sóz bar. Sizder eldik pen erliktiń týyn bıik ustap júrsizder. Aldaǵy ýaqytta da qasıetti Otanymyzdy qorǵap, tabandy eńbek etesizder dep senemin. Armııamyzdyń aıbyny arta bersin! Elimiz aman, áskerimiz qýatty bolsyn! – dedi Prezıdent.
Budan keıin Memleket basshysy áskerı boryshyn úlgili atqarǵany, Birikken Ulttar Uıymynyń Golan jotalaryndaǵy bitimgerlik mıssııasyn júzege asyrý barysynda kórsetken erligi men janqııarlyǵy úshin bir top áskerı qyzmetshini memlekettik nagradalarmen marapattady.
Aıta ketelik Qazaqstandyq bitimgerler Sırııadan elge oralǵan edi. Qazaqstandyq bitimgerler BUU-nyń 24 qyzmetkerin evakýatsııalady. Sondaı-aq Sırııaǵa barǵan bitimger jergilikti halyqtyń armany týraly aıtqan edi. Sonymen qatar Prezıdent bir top bitimger áskerı qyzmetshini memlekettik nagradalarmen marapattaǵan edi.