Qazaq qyzy Qytaıda «Ulttar arýy» atandy
ASTANA. 16 qańtar. QazAqparat - Qytaıda taǵy bir qandasymyz qalyń eldi moıyndatty. Kúnbıke esimdi qazaq qyzy jýyrda ótken búkilqytaılyq qyz syny baıqaýynyń bas júldesin ıelendi. Bul dástúrli baıqaý Qytaıdy meken etetin 56 ult ókili arasynda ótkiziledi.
Osymen úshinshi ret uıymdastyrylyp otyrǵan arýlar baıqaýyna qazaq qyzy tuńǵysh ret qatysqan eken. Dese de, óneri, kórki, talantymen qytaılardyń tańdaıyn qaqtyrǵan qazaq arýy «56 ulttyń gúli» degen ataqqa ıe boldy. Kúnbıke jastaıynan Qytaıdyń bas telearnalarynda júrgizýshi bolýdy armandaǵan. Mıllıardtan astam halyq arasynan sýyrylyp shyǵý ońaı emesin uqqan ol armanyna qol jetkizýge bala kezinen daıyndaldy. Ónerde de, oqýda da ozat boldy. Qytaı, qazaq, aǵylshyn tilderinde emin-erkin sóıleıdi, dombyra tartady, án salyp, bı bıleıdi, taekvondomen aınalysady. Túrli saıystarǵa qatysyp, talaı sahnanyń tórinen kóringen. «Shyńjań arýlary» saıysynyń birneshe márte jeńimpazy. Endi «56 ulttyń arýy» atanyp otyr. Atalmysh saıys úsh jylda bir ret uıymdastyrylyp turady. Bıyl úshinshi kezegi ótti. Shyńjań avtonomııalyq okrýgynyń atynan bes ulttyń ókili qatysqan: qazaq, qyrǵyz, uıǵyr, ózbek jáne tatar arýlary, dep habarlaıdy «Qazaqstan» ulttyq arnasy. Qatysýshylar qytaı tili men óz ana tilin meńgerý, óz ultyn tanystyrý, án-bı ónerin kórsetýden jarysqan. Kúnbıke barlyq aınalymda aldyna jan salmady. Ásirese, qytaı tilinde, ıaǵnı, hanzýsha sóıleýden handyqtardyń ózderinen asyp túsken.
