Qaıyńdy kóline aparatyn jol kúzde paıdalanýǵa beriledi
QONAEV. KAZINFORM – Almaty oblysynyń týrızm basqarmasy óńirdegi eń kórikti oryndardyń biri – Qaıyńdy kóline baratyn 10 shaqyrymdyq avtojoldyń qurylysy týraly habarlady.
Vedomstvo basshysy Qýanyshbek Mırambekulynyń aıtýynsha, kólge aparatyn aýdandyq mańyzy bar joldy kúrdeli jóndeý jumystary bekitilgen kestege sáıkes júrgizilip jatyr. Ýchaskeniń jalpy uzyndyǵy – 9,9 shaqyrym, merdiger mekeme — «Servıs NS» JShS.
Quny 2,43 mlrd teńge bolatyn joba jergilikti bıýdjet esebinen qarjylandyrylǵan. Al negizgi jumystar jol jabynynyń sapasyn jaqsartýǵa jáne jol qozǵalysy qaýipsizdigin arttyrýǵa baǵyttalǵan.
– Qurylys jumystary 2025 jyldyń qazan aıynda bastaldy, al aıaqtalýy 2026 jyldyń qazanyna josparlanǵan, - dedi ol.
Qaıyńdy kóline aparatyn jol qurylysy birneshe jyldan beri talqylanyp keledi. Bul máselege 2023 jyly «Qaıyńdy – Saty» taý jolynda bolǵan jol apatynan keıin erekshe nazar aýdaryldy. Ol kezde jolaýshylar mingen avtobýs ÝAZ avtokóligimen soqtyǵysqan bolatyn.
Qazir týrıster Almaty oblysynyń eń kórikti oryndarynyń birin kórý úshin áli de jol talǵamaıtyn kóliktermen qatynaýǵa májbúr. Olar joldyń bir bóligin eski ÝAZ kólikterimen eńserip, qalǵan bóliginde jaıaý júredi.
2025 jyldyń jazynda Kegen aýdanynyń ákimi Nurbaqyt Teńizbaev Qaıyńdy kóline baratyn avtokólik joly qurylysynyń jobalaý-smetalyq qujattamasy ázirlengenin aıtqan edi.