10:00, 18 Sáýir 2025 | GMT +5
Katonqaraǵaıda qar jaýdy
ÓSKEMEN. KAZINFORM – Shyǵys Qazaqstan oblysy Katonqaraǵaı aýdanynda qar jaýyp ketti.
Keshe «Qazgıdromed» ShQO fılıaly oblys aýmaǵynda jańbyr men qar jaýýy múmkindigin eskertken. Rasymende búgin Katonqaraǵaı aýdanynda qalyń qar tústi.
ShQO Polıtsııa departamenti baspasóz qyzmetiniń málimetine súıensek, aýdanǵa qaraı jolǵa shyqqan kólik júrgizýshilerine barynsha saq bolý kerek.
— Aýa raıynyń kúrt nasharlaýyna jáne qalyń qardyń jaýýyna baılanysty jolda asa saq bolyńyzdar. Qaýipsizdik erejelerin qatań saqtap, jyldamdyqty ruqsat etilgen shekten asyrmańyzdar. Múmkindik bolsa aýa-raıy turaqtalǵansha uzaq saparǵa shyqpaǵan jón, — dep eskertti polıtseıler.
Eske salsaq, taıaýda Shyǵys Qazaqstanda joldy sý shaıyp ketken bolatyn.