Kaspııde qyrylǵan ıtbalyqtar sany 100-den asyp jyǵyldy
AQTAÝ. KAZINFORM — Mańǵystaý oblysynda Kaspıı teńiziniń jaǵalaýynan tabylǵan ıtbalyq ólekseleriniń sany 103-ke jetti.
Balyq ınspektsııasynyń qyzmetkerleri jaǵalaýdy qaraý kezinde 25 ıtbalyq óleksesin tapqanyn málimdep otyr.
«Jumys tobynyń quramyna kiretin jergilikti atqarýshy organdar, mamandandyrylǵan ǵylymı uıymdar, Kaspıı ıtbalyǵyn zertteý jáne ońaltý ortalyǵy, Gıdrobıologııa jáne ekologııa ınstıtýty, qazaqstandyq Qoldanbaly ekologııa agenttigi, Mıkrobıologııa jáne vırýsologııa ǵylymı-óndiristik ortalyǵy, oblystyń veterınarııalyq qyzmeti, ekologııa jáne polıtsııa departamentteri, tabıǵat qorǵaý prokýratýrasy atalǵan jaǵdaı jóninde jedel habardar etildi. Inspektsııa men jergilikti atqarýshy organ ókilderinen turatyn jumys toby ıtbalyq tabylǵan orynǵa shyqty. Búgingi tańda tabylǵan óli ıtbalyqtardyń jalpy sany 103 ushaǵa ótti», — dedi balyq ınspektsııasynyń ókilderi.
29 naýryz ben 1 sáýir aralyǵynda Túpqaraǵan aýdanynda Kaspıı teńiziniń jaǵalaýyna monıtorıng júrgizý kezinde 78 óli ıtbalyq ushasy tabylǵan bolatyn.
Keıin Mańǵystaý oblysynyń ekologııa departamenti atalǵan aýmaqtan sý synamasyn alyp, veterınarııalyq stantsııa men gıdrobıologııa jáne ekologııa ınstıtýtynyń qyzmetkerleri ishki aǵzalardyń tinin (baýyr, ókpe) ishinara iriktedi.
Sondaı-aq, Kaspıı ıtbalyǵyn zertteý jáne ońaltý ortalyǵy tıisti zerthanalyq zertteýler júrgizý úshin azý, tyrnaq jáne jún synamalaryn zerthanalyq zertteý júrgizýge jiberdi.
