Kaspıı jaǵalaýynan 117 ıtbalyq óleksesi tabyldy
AQTAÝ. KAZINFORM – Jaıyq-Kaspıı balyq sharýashylyǵy ınspektsııasymen 20-21 mamyr aralyǵynda Túpqaraǵan aýdany Fort-Shevchenko qalasynyń «Asan», «Baýtın kósesi», «Úrdik múıisi» jerlerine reıd júrgizý kezinde Kaspıı jaǵalaýynan 117 ıtbalyq óleksesi tabyldy.
Aýyl sharýashylyǵy mınıstrligine qarasty Balyq sharýashylyǵy komıtetiniń málimdeýinshe, tabylǵan teńiz janýarlarynyń deneleri qatty ydyraǵan. Osyǵan baılanysty synamalar alý múmkin bolmady. Tabylǵan ıtbalyqtar byltyr qarasha-jeltoqsan aılarynda ólgen degen boljam jasalyp otyr.
Bekitilgen is-shara algorıtmi boıynsha bul jaǵdaı barlyq quzyrly memlekettik organǵa habarlandy.
– Túpqaraǵan aýdanynyń Baýtın aýylynyń ákimdigi qyzmetkerleri, Túpqaraǵan aýdanynyń polıtsııa bólimi jáne balyq sharýashylyǵy qaýymdastyǵynyń Mańǵystaý oblysy fılıalymen teńiz jaǵalaýynan 5 shaqyrym qashyqtyqta jatqan ıtbalyqtardyń ólekseleri jınalyp, polıgonda sanıtarlyq normalardy saqtaı otyryp, joıyldy. Qazir teńiz jaǵalaýynyń boıynda monıtorıng jumystary jalǵasyp jatyr, - delingen Komıtet habarlamasynda.
Jalpy, búgingi kúnge byltyr qarasha aıynan jınalyp, joıylǵan ıtbalyqtar sany 2 194-ǵa jetti.
Eske sala keteıik, buǵan deıin Mańǵystaýda Aqshuqyr aýyly jaǵalaýynan 70-ke jýyq ıtbalyqtyń óleksesi tabylǵanyn jazǵan edik.