Kaspıı teńizin munaı daǵy basyp jatqany rastalmady — mınıstrlik
ASTANA. KAZINFORM — Ekologııa jáne tabıǵı resýrstar vıtse-mınıstri Jomart Álıev Kaspıı teńizin munaı daqtary basyp jatyr degen boljamdy joqqa shyǵardy.
— Bul aqparat byltyr da taraǵan, biraq ol derek rastalmady. Qazir atalǵan aqparattyń rastyǵy dáleldengen joq. Qazaqstan Respýblıkasynyń aýmaǵynda, sonyń ishinde Kaspııge de qatysty ǵaryshtyq monıtorıng bar. Bizdiń ǵaryshtyq zondtaýdan mundaı lastaný faktisin, ıaǵnı munaı daqtaryn anyqtaǵan joq, — dep jaýap berdi Jomart Álıev Úkimet otyrysynan keıin ótken baspasóz máslıhatynda.
Sondaı-aq mınıstrdiń orynbasary eko-belsendilerdiń Kaspıı teńizin munaı daqtary basyp jatyr degen dabyldy naqtylaı almaıtynyn aıtty.
— Belsendiler qatelesti me, álde jańsaqtyq pa, naqty aıta almaımyn. Aıta ketetin jaıt, keıde ǵaryshtyq zondtaýda burmalaný faktileri bolýy múmkin. Mysaly, bulttar nemese basqa da kóleńke túsiretin obektiler. Bul kóleńkelerdi munaı daǵy nemese lastaný oshaǵy dep qabyldaýǵa bolady. Bıyl mundaı fakti tirkelgen joq, — dep tolyqtyrdy vıtse-mınıstr.
Buǵan deıin Kaspıı teńizinen spýtnıkter apta saıyn jańa daqty tirkep jatqany týraly jazǵan edik.