Kásipqoı armııa - búgingi kún talaby - QR QM
Taıaýda Taldyqorǵan qalasynda Almaty oblysy Qorǵanys ister jónindegi departamenti uıymdastyrǵan jyljymaly tirkeý pýnkti qala ortalyǵyndaǵy halyq kóp bolatyn jerde kelisimshart boıynsha áskerı qyzmetke qabyldaý jóninde nasıhattaý jáne túsindirý jumystaryn uıymdastyrdy. Jyljymaly tirkeý pýnktiniń jumysy barysynda 90-ǵa jýyq azamatqa áskerı qyzmetke qabyldaný sharttary týraly keńes berildi.
Dál osyndaı jumys sol kúni Aqtóbe qalasynda da qolǵa alyndy.
Buryn habarlaǵanymyzdaı, halyqty qamtý aýqymyn ulǵaıtý maqsatynda kelisimshart boıynsha áskerı qyzmetke irikteýdiń respýblıka boıynsha 61 pýnkti quryldy, olardyń ishindegi 34 statsıonarlyq pýnkt qorǵanys isteri jónindegi departamentter men basqarmalardyń bazasynda óristetilse, 11 pýnkt halyqqa qyzmet kórsetý ortalyqtarynda áreket etýde. Bir pýnkt Astana qalasynyń temir jol vokzalynda jumys isteýde. Budan basqa respýblıkamyzda kelisimshart boıynsha áskerı qyzmetke irikteýdiń 15 jyljymaly pýnktiniń jumysy uıymdastyrylǵan.
2013 jyldyń naýryz aıynan bastap áskerı qyzmetke qabyldaý pýnktteri arqyly 2000-ǵa jýyq adam keńes alyp, 900-den astam zapastaǵy ofıtser áskerı qyzmetke qabyldaý týraly baıanat jazdy.
Elimizdiń barlyq óńirlerinde úgitteý-túsindirý sıpatyndaǵy is-sharalar uıymdastyrylýda. Buqaralyq aqparat quraldary arqyly halyqty kelisimshart boıynsha áskerı qyzmetke qabyldaý tártibi týraly habardar etý júrgizilip keledi.