Qasıetti Ramazan aıy bastaldy
ASTANA. KAZINFORM — Búgin, 11 naýryzda búkil álem musylmandary úshin eń qaıyrly da qasterli aı — Ramazan bastaldy.
Osyǵan oraı Qazaqstan musylmandary dinı basqarmasynyń basshysy, bas múftı Naýryzbaı qajy Taǵanuly elimizdegi búkil musylman qaýymdy quttyqtady.
«Barshamyzdy qasıetti Ramazan aıyna aman-esen jetkizgen Alla Taǵalaǵa sansyz shúkirler bolsyn. Sizderdi berekeli Ramazan aıynyń kelýimen quttyqtaımyn! Ramazan — on eki aıdyń sultany, berekeli de keshirimi mol aı. Kúndelikti tirshilik qamymen júretin pendeniń júregine bul aıda ıman nury quıylady. Óıtkeni oraza adamdy taqýalyqqa tárbıeleıdi. Sabyr, qaıyrymdylyq, meıirim, baýyrmaldyq sekildi adamdyq asyl qasıetter artyp, ıman kúsheıedi. Ramazan — Allanyń meıirimi tógilip, jumaqtyń esigi aıqara ashylatyn, ımandy kúsheıtýge múmkindik berilgen qasıetti aı. Bul — Jaratýshy Iemizdiń uly syıy ári nyǵmeti. Ramazannyń qadirin jaqsy túsingen sahabalar orazaǵa alty aı qalǵan sátten bastap: „Rabbymyz, bizdi Ramazan aıyna aman-esen jetkize gór!“ — dep duǵa etken. Saýap eselenip jazylatyn aıda jasalǵan qaıyrly istiń qaıtarymy adam balasy úshin qupııa-syr. Tipti aýyz bekitken adamǵa beriletin syı men saýap, qurmet pen marapat paıǵambarlar men perishtelerge de beımálim. Qudsı hadıste Alla Taǵala „Oraza — tek men úshin. Onyń syıyn (saýabyn) ózim ǵana beremin“ dep orazanyń qadiri men qasıetin, máni men mańyzyn baıandaǵan. Demek sharapaty men shapaǵaty mol aıda saýap jınaýǵa, ishki dúnıemizdi tazartýǵa, Jaratýshynyń razylyǵyn alýǵa asyqqan abzal. Pendeniń osy aıda ustaǵan orazasy, Allaǵa unamdy barlyq qulshylyqtary, ózgelerge jasaǵan qaıyrymdylyǵy, saýapty amaldary eselenip jazylady», — deıdi bas múftı.
Oraza — kúndiz tek iship-jeýden ózin shekteý degen sóz emes. Oraza — rýhtyń azyǵy, tánniń shıpasy. Ramazan jan men tándi rýhanı tazartatyn, musylman úshin úlken sabyr mektebi.
Aýzy berik jandar ózine dórekilik kórsetken keıbir kisilerge «men orazamyn» degen bir aýyz sózben kórkem minezdiń keremet úlgisin kórsetedi. Nápsisine toqtaý salyp, sabyr saqtaıdy. Al sabyr ıesine beriletin syı — jánnat.
Naýryzbaı qajy Taǵanulynyń aıtýynsha, densaýlyǵyna baılanysty nemese kárilik jetip oraza ustaýǵa shamasy jetpegen adamdar aýyz bekitken kisilerge aýyzashar berse, ol da — úlken saýap.
Paıǵambarymyz Muhammed (oǵan Allanyń salaýaty men sálemi bolsyn) «Alla Taǵala eń bolmasa bir túıir qurma, tipti bir urttam sýmen bolsa da qamqorlyq jasaǵanǵa saýap jazady» degen.
«Men osy rette barsha otandastarymdy qasıetti aıda júzege asatyn qaıyrymdylyq is-sharalarǵa úles qosýǵa shaqyramyn. Kásipkerlerdi áleýmettik mańyzy bar azyq-túlikterdiń baǵasyna jeńildik jasaýǵa úndeımin. Qoǵamdyq tamaqtaný oryndarynda aýyzashar mázirin halyqqa yńǵaıly baǵamen usyný da — saýapty istiń biri. Dúkenderde kúlli jamandyqtyń bastaýy bolǵan araq-sharap satylmasa degen tilegimizdi jetkizemiz. Sonymen qatar barsha halyqtyń ortaq ıgiligi úshin salynyp jatqan jol, kópir, mektep, meshit, medrese, balabaqsha, sport kesheni syndy mańyzdy ǵımarattarǵa az da bolsa úles qosyp, belsendilik tanytýǵa shaqyramyn. Raqym aıy — Ramazan qutty bolsyn! Qasıetti aıda ustaǵan orazamyz, jasaǵan duǵa-tilekterimiz, qulshylyq-ǵıbadattarymyz, árbir qaıyrly amaldarymyz qabyl bolǵaı! Alla Taǵala otbasymyzǵa amandyq, jumysymyzǵa bereke násip etkeı! Táýelsizdigimiz tuǵyrly, memleketimizdiń mereıi árqashan ústem bolǵaı! Ámın!» dep túıindedi sózin QMDB basshysy.
Biz osyǵan deıin Ramazan aıyndaǵy Oraza men namaz kestesin jarııalaǵan bolatynbyz.
Sondaı-aq Astanada osy qasıetti aıda 5 meshitke túngi avtobýstar qatynaıdy.
