Qyrǵyzstan stalkıng úshin aıyppul men bas bostandyǵynan aıyrý jazasyn engizbekshi
BІShKEK. KAZINFORM – Qyrǵyzstan qýdalaý úshin qylmystyq jaýapkershilikke tartýdy usynyp otyr, dep habarlaıdy Kazinform-nyń Bishkektegi menshikti tilshisi.
Tıisti zań jobasyn Joǵarǵy Keneshtiń (Parlament) depýtattary ázirlep, ol qoǵamdyq talqylaýǵa usynyldy.
Atap ótilgendeı, eldiń qoldanystaǵy zańnamasynda tulǵany onyń erkine qarsy júıeli túrde qýdalaýdy qamtıtyn qylmys quramy joq.
Túzetýlerge sáıkes, qylmystyq zańnamaǵa alǵash ret «stalkıng» uǵymy engizilip, ol úshin qylmystyq jaýapkershilikti belgileıdi.
Naqtyraq aıtqanda:
- Stalkıng – ıaǵnı adamdy zańsyz qýdalaý, onyń erkine qarsy onymen baılanys ornatý nemese baqylaýmen qatar júrý, onyń ishinde ınternetti qosa alǵanda, aqparattyq-kommýnıkatsııalyq tehnologııalardy paıdalaný arqyly, fızıkalyq zorlyq-zombylyqsyz, adamnyń konstıtýtsııalyq quqyqtary men bostandyqtaryn buzýǵa, fızıkalyq nemese psıhıkalyq azap shegýge nemese materıaldyq zalal keltirýge ákep soqtyrsa, alty aıdan bir jylǵa deıin bas bostandyǵyn shekteý nemese 20 myńnan 50 myń somǵa deıin (106 myńnan 264 myń teńgege deıin) aıyppul salýmen jazalanady.
- aıtarlyqtaı materıaldyq zalal keltirgen nemese 14 pen 18 jas aralyǵyndaǵy balaǵa nemese júkti áıelge qatysty jasalǵan stalkıng úshin bir jyldan úsh jylǵa deıin bas bostandyǵyn shekteý, 50 myńnan 100 myń somǵa deıin (264 myńnan 529 myń teńgege deıin) aıyppul nemese bir jylǵa deıin bas bostandyǵynan aıyrý jazasy qarastyrylǵan.
- 14 jasqa tolmaǵan balaǵa qatysty, jaldanyp nemese qyzmettik jaǵdaıyn teris paıdalaný arqyly jasalǵan qýdalaý úshin úsh jyldan bes jylǵa deıin bas bostandyǵynan aıyrý, úsh jylǵa deıin belgili bir laýazymdardy atqarý quqyǵynan aıyrý jáne múlkin tárkileý jazasy qarastyrylǵan.
Stalkıng – sezim emes, júıeli qýdalaý, ańdý jáne psıhologııalyq qysymnyń qylmystyq kórinisi. Kazinform tilshisi qaýipti qubylystyń sebep-saldaryn sarapshylarmen birge taldaǵan edi. Tolyǵyraq myna siltemeden oqyńyz.
