Qarýly kúshterde shuǵyl oqý-jattyǵý bastaldy
ASTANA. QazAqparat - 7 qarashada QR QK Joǵarǵy Bas Qolbasshysy N. Nazarbaevtyń tapsyrmasy boıynsha QR Qorǵanys mınıstri QR QK desanttyq-shabýyldaý áskerleri men Áýe qorǵanysy kúshteriniń áskerı bólimderin dabyl boıynsha kóterip, jaýyngerlik ázirliktiń joǵary dárejesine keltirdi, dep habarlaıdy mınıstrliktiń baspasóz qyzmeti.
Qarýly kúshterde «Quramalar men bólimderdi jaýyngerlik ázirliktiń joǵary dárejesine keltirý. Daǵdarystyq aýdanǵa qaıta toptasýdy uıymdastyrý. Arnaıy áskerı operatsııany daıyndaý jáne júrgizý» taqyrybynda QR QK desanttyq-shabýyldaý áskerlerimen shuǵyl oqý-jattyǵýy bastaldy.
Tekseris sheńberinde lekterdiń qurylý aýdanyna áskerı tehnıkanyń shyǵýy júzege asyryldy. Áskerler áskerı polıgondarǵa uzaq qashyqtyqqa quramdastyrylǵan tásilmen joryqqa shyǵady.
Oqý-jattyǵýǵa 5 myńǵa jýyq áskerı qyzmetshi, shamamen 500 birlik qarý-jaraq pen áskerı tehnıka, 20-dan asa birlik ushaq pen tikushaq tartyldy.
Oqý-jattyǵýdyń negizgi maqsaty - arnaıy áskerı operatsııany daıyndaý jáne júrgizý, ásker tekteriniń bólimderi men quramalary arasyndaǵy túraralyq ózara is-qımyldy uıymdastyrý, sondaı-aq, arnaıy áskerı operatsııany júrgizý amaldary men tásilderin jetildirý jóninde tapsyrmalardy oryndaýǵa basqarý organy men áskerlerdiń jaı-kúıin tekserý.
Oqý-jattyǵý qarashanyń 7-i men 11-i aralyǵynda ótedi. 
