Karol Navrotskıı Polsha prezıdenti qyzmetine kiristi

ASTANA. KAZINFORM — Polsha prezıdenti saılaýynda jeńiske jetken Karol Navrotskıı el prezıdenti qyzmetine resmı túrde kiristi, dep habarlaıdy TASS.

Onyń ınaýgýratsııasy sársenbi, 6 tamyz kúni Seımniń (parlamenttiń tómengi palatasy) jalpy otyrys zalynda ótti. Saltanatty rásimdi TVP Info telearnasy tikeleı efırde kórsetti.

Konstıtýtsııaǵa sáıkes Navrotskıı Ulttyq jınalys — Seım men Senat depýtattary aldynda ant berdi. 

Inaýgýratsııany uıymdastyrýǵa jaýapty Seım spıkeri Shımon Holovnıa Karol Tadeýsh Navrotskıı Polsha Respýblıkasynyń prezıdenti qyzmetine Ulttyq jınalys aldynda ant bergenin rastady.

Dástúr boıynsha ınaýgýratsııaǵa Seım men Senat depýtattary, úkimet músheleri (sonyń ishinde premer-mınıstr Donald Týsk), din ókilderi, qarýly kúshter men túrli elderdiń dıplomattary qatysty. Іs-sharaǵa Polsha Respýblıkasynyń eks-prezıdenti (1990–1995), Nobel syılyǵynyń laýreaty Leh Valensa kelmedi. Alaıda saltanatty jıynda Navrotskııge qarama-qarsy saıası lager ókilderi bolǵan burynǵy eki prezıdent — Aleksander Kvasnevskıı (1995–2005) jáne Bronıslav Komorovskıı (2010–2015) qatysty.

Oppozıtsııalyq «Quqyq pen ádilettik» partııasynyń qoldaýymen kandıdatýrasy usynylǵan Navrotskıı Polshada 18 mamyr men 1 maýsym kúnderi ótken eki týrlyq prezıdent saılaýynda jeńiske jetti. Ekinshi týrda ony saılaýshylardyń 50,89 paıyzy qoldady.

Al bıleýshi «Azamattyq koalıtsııadan» kandıdat, Varshava meri Rafal Tshaskovskıı 49,11 paıyz daýys jınady. Bıleýshi koalıtsııanyń keıbir ókilderi daýystardy sanaý kezinde zań buzýshylyqtar boldy dep, barlyq ýchaskede nátıjelerdi qaıta esepteýdi talap etti.

Polshada prezıdent saılaýy ár bes jyl saıyn ótedi. Bir adam bul joǵary laýazymdy qatarynan eki merzimnen artyq atqara almaıdy.

Aıta keteıik, Memleket basshysy saılaýda jeńiske jetken Polsha prezıdentine quttyqtaý jedelhatyn joldady.