Qaryzdy zańdy túrde qalaı esepten shyǵarýǵa bolady

PETROPAVL. KAZINFORM – Qaryz - qoǵamdaǵy ózekti taqyryptardyń biri. Qarjylyq qıyndyq kez kelgen adamdy tyǵyryqqa tireýi múmkin. Mundaı jaǵdaıda eń bastysy – zań aıasynda durys sheshim tabý. Qaryzdan qutylýdyń joldary týraly Soltústik Qazaqstan oblystyq advokattar alqasynyń advokaty Olga Gavrık tarqatyp aıtyp berdi.

Mamannyń aıtýynsha, oǵan sońǵy ýaqytta «qaryzdy zańdy túrde qalaı jabýǵa nemese esepten shyǵarýǵa bolady?» degen suraqpen keletinder qarasy kóbeıgen. Oǵan naqty jaýap berý úshin aldymen qaryzdyń túrin, onyń qashan paıda bolǵanyn, qaı ýaqytta qaıtarylýy tıis ekenin jáne merziminiń ótip-ótpegenin anyqtap alý qajet.

- Bankrottyq - qaryzdan zańdy túrde qutylýdyń bir joly. Qazaqstan zańyna sáıkes, bul - adamnyń qaryzdaryn tóleýge qabiletsiz ekenin memleket resmı túrde tanıtyn rásim. Bankrottyqtan ótken adamǵa kredıtorlar qysym jasaı almaıdy, kollektorlar da mazalamaıdy. Ýaqyt óte kele onyń nesıe tarıhy da qaıta qalpyna keledi, - deıdi Olga Gavrık.

Advokattyń aıtýynsha, qaryzdan qutylýdyń taǵy bir joly - talap qoıý merziminiń ótýin kútý. Qoldanystaǵy zańnamaǵa sáıkes, talap qoıý merzimi - 3 jyl. Alaıda bul sotta avtomatty túrde qoldanylmaıdy. Ol úshin talap qoıý merziminiń ótkendigin aıtyp, mindetti túrde jaýapker sotqa deıin nemese sot barysynda arnaıy ótinish jasaýy tıis. Eger talap qoıý merzimi ótip ketken bolsa, sot talap aryzdy qanaǵattandyrýdan bas tartady.

- Tájirıbede jıi kezdesetin taǵy bir tásil - qaryzdy atqarýshylyq is júrgizý barysynda esepten shyǵarý. Keıbir jaǵdaılarda jeke sot oryndaýshysy zańǵa sáıkes atqarýshylyq qujatty (oryndaý paraǵyn) qaryzdy óndirip alýshyǵa oryndaýsyz qaıtarady. Eger óndirip alýshy ony qaıtadan oryndaýǵa bermeı, ýaqyt ótkizip alsa, mysaly, umytyp ketse jáne sol sátten bastap 3 jyl ótse, siz ózińizdi boryshkerler tiziminen shyǵarý úshin sot oryndaýshysyna ótinish bere alasyz. Bul jaǵdaıda qaryz merzimi ótip ketken bolyp esepteledi, - deıdi Olga Gavrık.

Nátıjesinde osy ótinish negizinde sot oryndaýshysy Ádilet organdaryna usynys joldaıdy, keıin boryshker tizilimnen jáne qaryz is júzinde esepten shyǵarylady.

- Qoryta aıtqanda, qaryzdy zańdy túrde esepten shyǵarýdyń úsh joly bar: barankrottyq rásimi, talap qoıý merziminiń ótýi,
atqarýshylyq is júrgizý merzimderiniń aıaqtalýy. Alaıda árbir jaǵdaı jeke qarastyrylýy tıis. Sondyqtan naqty sheshim qabyldamas buryn zańgerdiń keńesine júgingen durys, - deıdi advokat.

Buǵan deıin ózine ádeıi bankrottyq jarııalaǵandar qandaı jaýapkershilikke tartylatyndyǵyn jazǵan edik.