Qarııalarǵa qamqorlyq kórsetildi
BATYS QAZAQSTAN OBLYSY. 8 Qazan. QazAqparat /Dildá Bekqojına/ - Saryómir aýylynda Qarttar kúnine oraı H.Esenjanov atyndaǵy orta mektepte aýyl ákimi Sabyrbek Mýsınniń bastamasymen «Darııa-keýde taý músin, qarttarym aman-saýmysyń?!» atty merekelik shara ótkizildi.
«Biz aýyldyń aqsaqaldary men aq jaýlyqty analary jas ta bolsa, bir qaýym elge bas bolyp kelgen jańa ákimimiz Sabyrbek Mýsınge dán rızamyz. Ol kelgeli Saryómir aýyldyq okrýginde áleýmettik salaǵa jan bitti», - deıdi aýyl turǵyndary.
Ardager muǵalimder men aýyl aqsaqaldary úshin arnaıy qoı soıylyp, merekelik dastarqan jaıyldy. Sonymen qatar, osyndaı úlken qurmet «Nábııa» kafesinde kórsetildi. Shara barysynda týǵan jer, ata-ana, Otan taqyryptarynda ánder shyrqalyp, bı bılendi.
Oǵan jınalǵan aqsaqaldar osynaý tamasha sharany ótkizýge belsene atsalysyp, demeýshilik etken mektep dırektory Shárapı Shotanovqa jáne osyndaǵy sharýa qojalyqtarynyń jetekshileri men jeke kásipkerlerge alǵys aıtty.
