Qarın: «Taza Qazaqstan» qundylyqtary jańa Konstıtýtsııa qaǵıdattaryna tolyq saı keledi
ASTANA. KAZINFORM — Memlekettik keńesshi Erlan Qarın Prezıdenttiń «Taza Qazaqstan» bastamasyn júzege asyrý máseleleri jóninde jıyn ótkizdi, dep habarlaıdy Aqordanyń baspasóz qyzmeti.
Keńeske memlekettik organdar men Prezıdent Ákimshiligi qurylymdyq bólimsheleriniń basshylary qatysty.
Erlan Qarın Naýryznama aıasynda «Tazarý» kúnin atap ótý jalpyulttyq «Taza Qazaqstan» jobasyn odan ári iske asyrýǵa jańa serpin beretinin jetkizdi.
Memlekettik keńesshi «Taza Qazaqstan» qundylyqtary jańa Konstıtýtsııanyń qaǵıdattaryna tolyq saı keletinin eske saldy.
— Jaýapty ári jasampaz otanshyldyq ıdeıasyn ilgeriletý Ata Zańnyń 3-babynyń 1-tarmaǵyndaǵy Qazaqstan Respýblıkasy qyzmetiniń negiz quraýshy qaǵıdattarynyń biri retinde bekitilgen. «Taza Qazaqstan» atalǵan konstıtýtsııalyq qaǵıdatty naqty júzege asyrýda ıdeologııalyq alańǵa aınala alady, — dedi Erlan Qarın.
Memlekettik keńesshi bul iske qoǵamdastyqty, eń aldymen, eriktiler men jastar uıymdaryn keńinen tartý, sondaı-aq «Taza Qazaqstan» jobasy aıasynda ótkiziletin aktsııalar men is-sharalardy aqparattyq turǵydan jan-jaqty súıemeldeý jóninde naqty tapsyrma berdi.
Osydan buryn Úkimette Prezıdenttiń «Taza Qazaqstan» bastamasyn júzege asyrý barysy qaralǵanyn jazǵanbyz.
