Qarın Prezıdenttiń sózinen ózi mańyzdy sanaǵan 10 tujyrymdy jarııalady
ASTANA. KAZINFORM — Aýyl sharýashylyǵy eńbekkerleriniń dástúrli forýmynan keıin Vıtse-prezıdent Telegram-daǵy paraqshasynda jıynda kóterilgen máseleler men el damýyna qatysty ózekti taqyryptar týraly jazdy. Ol Prezıdenttiń sózinen ózi mańyzdy dep sanaǵan on tujyrymdy bólisti.
Vıtse-prezıdenttiń jazýynsha, forýmda strategııalyq mańyzy zor aýyl sharýashylyǵy salasynyń ózekti máseleleri men olardy sheshý joldary talqylanǵan. Al aýyldy, agroónerkásip keshenin damytý jáne aýyl turǵyndarynyń ál-aýqatyn arttyrý Prezıdenttiń udaıy nazarynda.
Ol Memleket basshysynyń búgingi jáne bolashaqtaǵy kún tártibine qatysty birqatar máseledegi ustanymyna toqtalyp, on tujyrymdy jeke-jeke atap ótken.
1. «Qurylys jáne taǵy da qurylys».
«Bul – bizdiń qubylmaly, turaqsyz álemniń syn-qaterlerine laıyqty jaýabymyz. Geosaıası jáne ekonomıkalyq ahýaldyń qalaı órbıtinin boljap bolmaıtyn osyndaı kúrdeli jaǵdaıda memleketimizdiń jáne árbir azamatymyzdyń qaýipsizdigin qamtamasyz etýdiń baıypty ári eń utymdy joly da – osy. Biz birtutas qoǵamymyzdyń múddesi úshin Ádiletti Qazaqstannyń ár kirpishin birge qalaımyz».
2. «Halyqtyq qurylys» baǵdarlamasy jáne reformalar.
«„Halyqtyq qurylys“ baǵdarlamasy, sybaılas jemqorlyqqa qarsy batyl kúres, sondaı-aq, memlekettik basqarý júıesin reformalaý, jasampazdyqqa bastaıtyn jańa qundylyqtardy qoǵamda ornyqtyrý – jańa ári úlken joldyń basy ǵana. Alda atqarylar is te, baǵyndyrar beles te kóp».
3. Eldiń orta jáne uzaq merzimdi damýy.
«Prezıdentimizdiń elimizdi damytý jóninde orta jáne odan keıingi merzimge arnalǵan naqty oılary men josparlary bar. Qazirgi tańda elimizdiń Egemendigi men Táýelsizdigine qatysty barlyq másele sheshimin tapty dep aıtýǵa áli erte».
4. Memleketshil tulǵalar qajet.
«Elimizge halyqtyń ál-aýqaty men ult múddesin jeke bastyń paıdasynan bıik qoıatyn shyn mánindegi memleketshil tulǵalar qajet. Dúnıe-dáýlet – ótkinshi, biraq, halyqtyń qamy úshin atqarylǵan naqty ister, azamattyń jaqsy aty árdaıym eldiń esinde saqtalady. Sol sııaqty boı kótergen áleýmettik nysandar qaı kezde de adamdardyń, óskeleń urpaqtyń ıgiligine jaraı beredi».
5. Halyq pen memleketke qyzmet etý.
«Halyq pen memleket ıgiligi úshin qyzmet etý – zor mártebe. Mundaı múmkindik ár azamatqa buıyra bermeıdi. Sondyqtan, bul mindetke salǵyrt qaraý – túptep kelgende, ulttyq múddege nuqsan keltiretin zańǵa qaıshy áreket».
6. Búgingi naqty qyzmet baǵalanýǵa tıis.
«Keshegi jetken jetistikter emes, búgingi naqty qyzmet baǵalanýǵa tıis. Prezıdent kez kelgen laýazymdy tulǵadan, eń aldymen, jeke tártip máselesine basa mán berip, adal ári jınaqy bolýdy, memleket múddesin bárinen bıik qoıýdy talap etedi».
7. Konstıtýtsııalyq qundylyqtardy saqtaý.
«Barlyq deńgeıdegi basshylar konstıtýtsııalyq qundylyqtardyń mánin túsinip, ony berik ustanýǵa jáne naqty júzege asyrýǵa, Ádiletti Qazaqstan qurý ıdeıasyna adal bolýǵa tıis».
8. Zań aldynda bári teń.
«Búginde joǵary memlekettik marapat, sapaly bilim, mol tájirıbe eshkimge zań aldynda artyqshylyq bermeıdi jáne bul solaı bolyp qala berýge tıis».
9. «Zań men Tártip» qaǵıdaty.
«Konstıtýtsııada bekitilgen „Zań men Tártip“ qaǵıdaty – myzǵymas ustanym. Ol ataq-dárejesine, qoǵamdaǵy orny men laýazymyna qaramastan barlyq azamatqa birdeı qoldanylady».
10. Instıtýttarǵa negizdelgen memleket.
«Biz azamattardyń tabysy men ál-aýqaty jekelegen tulǵalarǵa emes, ornyqty ınstıtýttarǵa baılanysty bolatyn memleket quryp jatyrmyz».