Erlan Qarın: Prezıdenttiń tapsyrmasy oryndaldy — Qazaqstannyń kıeli nysandary ıÝNESKO tizimine endi
ASTANA. KAZINFORM — Prezıdent Ákimshiligi basshysynyń birinshi orynbasary Erlan Qarın Mańǵystaýdaǵy jerasty meshitteriniń ıÝNESKO-nyń Dúnıejúzilik muralar tizimine engizilýine qatysty pikir bildirdi.
— Memleket basshysy Qasym-Jomart Toqaevtyń bastamasymen ári tikeleı qoldaýymen Mańǵystaýdyń jartasty meshitteri (Beket ata, Shopan ata, Qaraman ata, Shaqpaq ata, Sultan Úpi) ıÝNESKO-nyń Dúnıejúzilik muralar tizimine engizildi. Búgin Koreıa Respýblıkasynyń Pýsan qalasynda ótip jatqan Dúnıejúzilik muralar komıtetiniń 48-shi sessııasynda osyndaı oń sheshim qabyldandy.
Bul — Qazaqstan tarıhyndaǵy aıtýly oqıǵa. Óıtkeni, tól mádenı muramyz ıÝNESKO-nyń bedeldi tizimine sońǵy ret 22 jyl buryn, ıaǵnı 2004 jyly qosylǵan bolatyn (2003 jyly — Qoja Ahmet ıAsaýı kesenesi, 2004 jyly — Tańbaly petroglıfteri). Keıingi jyldary ǵana Prezıdenttiń bastamasymen bul baǵyttaǵy jumys qaıta jandanyp, jańa deńgeıge kóterildi, — dedi Erlan Qarın.
Atap aıtqanda, Qasym-Jomart Toqaev 2024 jyly Ulttyq quryltaıdyń Atyraýda ótken úshinshi otyrysynda Mańǵystaýdyń jartasty meshitterin ıÝNESKO muralary tizimine qosý jumystaryn bastaýdy tapsyrdy.
— ıÝNESKO tiziminen laıyqty oryn alý — biz úshin zor maqtanysh. Ári bul — úlken jaýapkershilik júkteıtin tarıhı jetistik.
Komıtettiń 48-shi sessııasynda sóılegen sózimde atap ótkenimdeı, Mańǵystaýdyń jartasty meshitteri tek qulshylyq jasaıtyn meken ǵana emes, óz zamanynda bilim men aǵartýdyń ózindik ortalyqtary boldy. Bul jartastarda halqymyzdyń tarıhı jady, ata-babalarymyzdyń amanaty saqtalǵan. Osylaısha, ıÝNESKO atalǵan nysandardy kópǵasyrlyq rýhanı, mádenı, arhıtektýralyq dástúrlerdiń ozyq úlgisi retinde moıyndady, — dedi ol.
Tarıhı nysandardyń ıÝNESKO tizimine enýi álem nazaryn kezekti ret Qazaqstanǵa aýdartyp, otandyq týrızmge sony serpin ákeledi. Ári ınfraqurylymdyq jobalardy júzege asyrýǵa jol ashady.
— Bul — úlken jumystyń basy ǵana. Memleket basshysy Ulttyq quryltaıdyń Atyraýda, Túrkistanda, Qyzylordada ótken otyrystarynda ıÝNESKO tizimderine ulttyq nomınatsııalardy qosý isin jan-jaqty jandandyrýdy tapsyrǵan edi. Dálirek aıtsaq, aldymyzda taza aǵashtan salynǵan Jarkent meshiti men Almatydaǵy Voznesensk kafedraldy shirkeýin, Qarataý petroglıfterin, hákim Abaıdyń «Qara sózderin» ıÝNESKO tizimderine engizý mindeti tur. Bizdiń endigi kúsh-jigerimiz osyǵan baǵyttalady, — dedi Erlan Qarın.
Aıta ketelik Prezıdent Ákimshiligi basshysynyń birinshi orynbasary Erlan Qarın Mańǵystaýdyń jartasty meshitteri ıÝNESKO-nyń Dúnıejúzilik muralar tizimine enetinin málimdegen edi.
